«Astana» Eýropa lıgasynda «Santa-Kolomamen» teń tústi
NUR-SULTAN. QazAqparat - Búgin fýtboldan UEFA Eýropa lıgasy aıasyndaǵy ekinshi irikteý kezeńiniń alǵashqy oıyndary aıaqtaldy. Elordalyq «Astana» syrt alańda Andorranyń «Santa-Koloma» komandasymen kezdesti, dep habarlaıdy QazAqparat tilshisi.
«Santa-Koloma» jarysty atalmysh týrnırdiń aldyn ala irikteý satysynan bastady. Aldymen, aldyn ala irikteýdiń jartylaı fınalynda San-Marınonyń «Tıre Penne» komandasyn 1:0 esebimen jeńip, odan keıin fınalda Kosovonyń «Ferronıkelı» klýbyna 1:2 esebimen jol berdi. Osylaısha, Eýropa lıgasy ekinshi irikteý satysyna qatysatyn boldy.
Búgingi «Astana» - «Santa-Koloma» matchy Andorra-la-Velıa eldimekenindegi 1 600 adam sııatyn «Komýnal» stadıonynda ótti. Bul eldimekende 3 myńǵa tarta adam turady.
«Santa-Koloma» «Astanaǵa» laıyqty qarsylyq kórsete aldy. Birinshi kezeńde oıyn tizgini negizinen elordalyq fýtbolshylar qolynda boldy. Dese de, alań ıeleri qarsy shabýyl uıymdastyrdy. Bul kezeńde «Astananyń» gol soǵatyn eki múmkindigi bolǵan edi. Degenmen, ony elordalyq fýtbolshylar oryndaı alǵan joq. Onyń birinde dop qaqpa baǵanasyna tıip, keıin serpildi. Ekinshisinde alań ıeleriniń qaqpashysy ábjildik tanytty. Kezdesý 0:0 esebimen teń aıaqtaldy.
Endi eki komanda 1 tamyzda qarymta oıyn ótkizedi. Bul kezdesý Nur-Sultan qalasynda ótedi. Jeńimpaz komanda jarystyń kelesi satysynda búgingi tańda Chempıondar lıgasy ekinshi satysynda synǵa túsip jatqan «Ferentsvarosh» (Vengrııa) jáne «Valletta» (Malta) jubynyń jeńilgen komandasymen sheberlik baıqasady.
Sondaı-aq, Eýropa lıgasy ekinshi irikteý kezeńinde 25 shildede syrt alańda Almatynyń «Qaıraty» «Hapoel» (Bezr-Sheva), Shymkenttiń «Ordabasy» klýby Chehııanyń «Mlada-Boleslav» komandasymen kezdesedi.
