Astana eýrazııalyq qalanyń prototıpine aınala alady ma
ASTANA. QazAqparat - Eki kún boıy elordada tájirıbe almasqan otandyq jáne germanııalyq sáýletshiler osy saýaldyń jaýabyn izdedi. Sáýlet salasynyń belgili doktory Fılıpp Moızerdiń jetekshiligimen ótken «dóńgelek ústelge» eki eldiń jas ári tájirıbeli sáýletshileri qatysty, dep habarlaıdy QazAqparat elorda ákimdiginiń medıa ortalyǵyna silteme jasap.
Jıynnyń alǵashqy kúni Qazaqstan men Germanııanyń JOO-larynda oqyp jatqan jas sáýletshilerge arnaldy.
Ekinshi kúngi bas qosýǵa almanııalyq 30-ǵa tarta bilikti ári belgili sáýletshi maman qatysty. Sáýletshiler Astananyń tirshiligimen, sonyń ishinde qala qurylysyn damytýǵa arnalǵan sheshimderimen tanysty. Olar elordanyń damý dınamıkasyna, jasyl aımaǵy men ınfraqurylymyna qatysty tańdanystaryn jasyrmady.
Uıymdastyrýshylardyń málimetinshe, elordada alǵash ret ótkizilgen ashyq suhbat alańy aldaǵy ýaqytta jalǵasyn tabatyn bolady. Jaqyn arada dál osyndaı kezdesý aǵylshyn sáýletshilerimen birlesip ótkizilmek.
«Fılıpp Moızer eýrazııalyq qalanyń tıpologııasyn jasap shyǵarý úshin keldi. Ol postkeńestik kezeńniń qalalaryn zerttep, olardy birneshe topqa jiktedi. Astana eýrazııalyq qalalar sanatyna kirdi. Onyń maqsaty -Astanadan eýrazııalyq qalanyń prototıpin jasaý jáne naqty eýrazııalyq qalalardy sıpattaıtyn naqty ólshemin anyqtaý. Bul úlken ǵylymı eńbektiń alǵashqy bóligi dep ataýǵa bolady. Keleshekte biz onyń zertteý eńbegin qural retinde paıdalanyp, qoldanysta kórgimiz keledi», - dedi Astana qalasy ýrbanıstıka ortalyǵy basshysynyń orynbasary Ashat Sádýov.
