«Astana Eurasian Book Fair – 2026»: elordada halyqaralyq kitap kórmesi ótip jatyr
Elordada QR Prezıdentiniń ortalyǵynda «Astana Eurasian Book Fair – 2026» IX Halyqaralyq kitap kórme-jármeńkesiniń saltanatty ashylý rásimi ótti, dep habarlaıdy qala ákimdiginiń resmı saıty.
Ortalyq Azııadaǵy eń aýqymdy mádenı-aǵartýshylyq sharaǵa memleket jáne qoǵam qaıratkerleri, tanymal qalamgerler men sheteldik elshiler qatysyp jatyr.
«Astana Eurasian Book Fair – 2026» kitap kórme-jármeńkesin Mádenıet jáne aqparat mınıstrligi, Astana qalasynyń ákimdigi jáne «Qazaq Creative» Kreatıvti ındýstrııalardy damytý qorynyń qoldaýymen «Folıant» baspasy uıymdastyrdy.
«Astana Eurasian Book Fair – 2026» kórmesine 80-nen astam kitap shyǵarý, tanymdyq-ǵylymı bilim berý jáne polıgrafııalyq kompanııalar qatysady. Onyń teń jartysy – qazaqstandyq uıymdar. Sondaı-aq Qazaqstan, Reseı, Túrkııa, Qyrǵyzstan, Ózbekstan, Ázerbaıjan, Mońǵolııa, Ispanııa, Qytaı, Iran, Belarýs, Portýgalııa, Venesýela, Ulybrıtanııa elderinen kóptegen uıym qatysqaly otyr.
«Astana Eurasian Book Fair – 2026» kitap kórme-jármeńkesi bes kúndik mádenı-iskerlik baǵdarlamadan turady. Kórme aıasynda jańa kitaptardyń tusaýkeserleri, avtormen kezdesý, avtograf-sessııalar, balalar alańynda arnaıy sheberlik saǵattary ótkiziledi.
Atap aıtqanda, Túrkııa Mádenıet jáne týrızm mınıstrliginiń qoldaýymen jaryq kórgen «Túrik ashanasy» kitabynyń, Bekarys Shoıbekovtiń «Aıtystyń altyn aıdar Bekarysy» aıtystar jınaǵynyń, Marjan Ershýdiń «Jalǵyz qol» poemasynyń, «Zamandastar» serııasymen shyqqan «Eldos Smetov. Tózim. Senim. Jeńis» kitabynyń, Erlan Qojabaevtyń «Qazaq oıýlary» fotoalbomynyń, Anjeı Sapkovskııdiń «Mystanger» fantastıkalyq shyǵarmasynyń, Ularbek Dáleıdiń «Batý han» tarıhı romanynyń, Álisher Rahattyń «Iesiz kóleńke», ıspan jazýshysy Haver Moronyń «Úmit sapary», Ernest Hemıngýeıdiń «Qońyraý kimdi joqtaıdy», Ázerbaıjan aqyny Rásmııa Sabırdiń «Óleń-áıel», Baıyt Qabanulynyń «Mońǵol-óleń» kitabynyń, Nursultan Myqtybaıdyń «Aq Jaıyqtyń kóz jasy», sondaı-aq «Túrkistan – máńgilik ári árdaıym jańa» jáne «Dımash Qudaıbergen. Sheksiz mýzyka» atty kitap-albomdarynyń tanystyrylymy ótedi dep josparlanyp otyr.
Sondaı-aq Ulttyq kitap kúni merekesine oraı 23 sáýirde Qazaqstan Respýblıkasynyń Mádenıet jáne aqparat mınıstrligi uıymdastyrǵan respýblıkalyq «Ulttyq kitap» baıqaýynyń nátıjesi boıynsha jeńimpaz baspalardy marapattaý rásimine arnalǵan saltanatty shara ótedi.
Aıta ketý kerek, «Astana Eurasian Book Fair – 2026» IX Halyqaralyq kitap kórme-jármeńkesi 22-26 sáýir aralyǵynda Astana qalasyndaǵy Qazaqstan Respýblıkasy Prezıdentiniń ortalyǵynda uıymdastyrylady.
Eske salsaq, buǵan deıin bilim berý uıymdarynyń kitaphanalary zamanaýı tsıfrlyq sheshimderge kóship jatqanyn jazǵan edik.
