Astana-Ereımentaý kúre jolynda jeńil avtokólik 47 jolaýshysy bar avtobýspen soqtyǵysyp qaldy, adam shyǵyny bar - TJM
ASTANA. Jeltoqsannyń 2-si. QazAqparat - Keshe, seısenbi kúni respýblıkanyń joǵary jyldamdyqty avtojoldarynda 4 jol-kólik oqıǵasy oryn aldy.Onyń saldarynan 5 adam qaza taýyp, taǵy 7 adam túrli dene jaraqattaryn aldy,
dep habarlaıdy QazAqparat Tótenshe jaǵdaılar mınıstrligine silteme jasap.
Máselen, Aqmola oblysy Astana-Ereımentaý avtojolynyń 110-shy shaqyrymynda 21 saǵat 10 mınýtta «Mersedes» jeńil avtokóligi ishinde 47 jolaýshysy bar «Neoplan» úlgisindegi marshrýtty avtobýspen soqtyǵysyp, onyń saldarynan «Mersedestiń» júrgizýshisi oqıǵa ornynda kóz jumyp, onyń 33 jasar jolaýshysy aýrýhanaǵa jetkizildi.
Almaty oblysy Almaty-Bishkek avtojolynyń 135-shi shaqyrymynda 14.20-da «Mersedes» jáne «Toıota» avtokólikteriniń soqtyǵysýynan birinshi kóliktiń jolaýshysy oqıǵa ornynda mert bolsa, ekinshi kóliktiń júrgizýshisi men onyń 29-daǵy jolaýshysy jańa týǵan nárestesimen birge aýrýhanaǵa jetkizildi.
Sondaı-aq Soltústik Qazaqstan oblysy Jezqazǵan-Petropavl avtojolynyń 909-shy shaqyrymynda «Toıota» mashınasy «KamAZ» júk kóligimen túıisip, jol-kólik oqıǵasy nátıjesinde jeńil kóliktiń júrgizýshisi men onyń jolaýshysy oqıǵa ornynda jan tásilim etti.
Mańǵystaý oblysy Beıneý-Aqtaý avtojolynyń 40-shy shaqyrymynda «KamAZ» avtokóligi aýdarylyp, onyń saldarynan kóliktiń 51 jastaǵy jolaýshysy qurban boldy, júrgizýshi men taǵy bir jolaýshy túrli dene jaraqattaryn aldy.
