Astana — Erevan áýe qatynasy qaıta jandanýy múmkin
ASTANA. KAZINFORM — Qazaqstan Respýblıkasy Kólik mınıstri Nurlan Saýranbaev Armenııa Respýblıkasynyń Aýmaqtyq basqarý jáne ınfraqurylym mınıstri Davıd Hýdatıanmen kezdesti, dep habarlaıdy mınıstrliktiń baspasóz qyzmeti.
Kezdesý barysynda taraptar Qazaqstan men Armenııa arasyndaǵy kólik-logıstıka salasyndaǵy yntymaqtastyqty damytý máselelerin talqylady. Kólik salasyndaǵy ózara is-qımyldyń basym baǵyttaryna, onyń ishinde ınfraqurylymdy damytýǵa, ozyq tehnologııalardy engizýge, sondaı-aq júk tasymaly kólemin arttyrýǵa erekshe nazar aýdaryldy.
— Sonymen qatar Astana — Erevan jáne Aqtaý — Erevan baǵyttary boıynsha áýe qatynasyn qaıta jandandyrý máselesi qaraldy. Reısterdiń jaqyn arada iske qosylýy kútilýde. Bul saýda-ekonomıkalyq baılanysty nyǵaıtýǵa jáne týrızmdi damytýǵa qolaıly jaǵdaı jasaıdy, — delingen habarlamada.
Kezdesý qorytyndysy boıynsha taraptar yntymaqtastyqty odan ári nyǵaıtýǵa ózara múddelilik tanytyp, ózara is-qımylǵa daıyn ekenderin bildirdi.
Osyǵan deıin Qazaqstan men Armenııa bir-birinde medıtsına kúnderin ótkizýge ýaǵdalasqanyn jazdyq.