Astana erekshe qajettiligi bar adamdarǵa arnalǵan shahmat olımpıadasy ótedi

ASTANA.KAZINFORM - Bıyl 20–25 qazan aralyǵynda Astanada erekshe qajettilikteri bar adamdarǵa arnalǵan ІІ Shahmat olımpıadasy (2nd Chess Olympiad for People with Disabilities) ótedi. Bul týraly Týrızm jáne sport mınıstrligi habarlady.

Oǵan álemniń 32 elinen kelgen 35 komanda qatysady. Saltanatty ashylý rásimi 20 qazan kúni saǵat 14:00-de bastalady.

Jarys Paralımpıadalyq jattyǵý ortalyǵynda (Nura aýdany, Qaraótkel-3 shaǵyn aýdany, Aqshoqy qıylysy, 2) ótedi.

1–5-týrlar 20–24 qazan aralyǵynda saǵat 15:00-de bastalady, al 6-shy týr 25 qazanda saǵat 11:00-de ótedi.

25 qazannyń keshinde jeńimpazdar men júldegerlerdi marapattaý jáne jabylý saltanaty uıymdastyrylady.

Erekshe qajettilikteri bar adamdarǵa arnalǵan ІІ Shahmat olımpıadasy (2nd Chess Olympiad for People with Disabilities) – «tórtke tórt» formatyndaǵy komandalyq jarys.

Aralas komandalar úsh sanattaǵy oıynshylardan quryla alady: estý qabileti buzylǵandar, kórý qabileti buzylǵandar jáne tirek-qımyl apparaty zaqymdanǵandar (TQAZ). Ár komandada kem degende bir áıel oıynshy jáne qalaǵan jaǵdaıda kem degende eki halyqaralyq shahmat federatsııasy (FIDE) reıtıngi bar oıynshy bolýy tıis. Komanda kapıtany oıynshy bola alady.

Qatysýshy komandalar:

• Eýropa – 9 komanda: Polsha (2023 jylǵy shahmat olımpıadasynyń jeńimpazy), Vengrııa, Germanııa, Izraıl, Soltústik Makedonııa, Serbııa, Ýkraına, Horvatııa jáne Chehııa;

• Azııa – 7 komanda: Bangladesh, Úndistan, Mıanma, BAÁ, Ózbekstan, FIDE-1 jáne Fılıppın;

• Soltústik jáne Ońtústik Amerıka – 7 komanda: Argentına, Venesýela, Kolýmbııa, Panama, AQSh Chılı jáne Kýba;

• Afrıka – 5 komanda: Mysyr, Zambııa, Zımbabve, Kenııa jáne Ýganda;

• Erekshe qajettilikteri bar oıynshylardyń halyqaralyq qaýymdastyǵy (International Associations of Players with Disabilities) úsh komandamen qatysady: estý qabileti buzylǵandar – International Chess Committee of the Deaf (ICCD), kórý qabileti buzylǵandar – International Braille Chess Association (IBCA), tirek-qımyl apparaty zaqymdanǵandar – International Physically Disabled Chess Association (IPCA);

• FIDE prezıdentiniń kvotasy boıynsha eki komanda usynylǵan – FIDE-2 jáne Qazaqstan ICCD;

• Jarys ıeleri – Qazaqstan eki komandamen shyǵady: Qazaqstan-1 jáne Qazaqstan-2.

Olımpıada aıasynda International School Chess Federation áleýmettik-bilim berý bastamalaryn júzege asyrady: grossmeısterdiń balalarmen bir mezette oınaý seansy, Kosta-Rıkanyń sport jáne rekreatsııa mınıstri Donald Rohas pen basqa da qonaqtarmen motıvatsııalyq kezdesý, sondaı-aq erekshe qajettilikteri bar balalardy qoldaýǵa baǵyttalǵan jattyqtyrýshylar men ata-analarǵa arnalǵan semınar ótedi.

Aıta keteıik, álem chempıonatynda qazaqstandyq jas shahmatshylar 3 altyn jeńdi.