«Astana-Energııa» AQ basqarmasynyń tóraǵasy para aldy degen kúdikpen qamaýǵa alyndy
ASTANA. QazAqparat - «Astana-Energııa» AQ basqarmasynyń tóraǵasy Marat Qabıdenov para aldy degen kúdikpen qamaýǵa alyndy, dep habarlaıdy QR Ekonomıkalyq qylmysqa jáne sybaılas jemqorlyqqa qarsy kúres agenttiginiń baspasóz qyzmetinen.
«Qarjy polıtsııasynyń Astana qalasy boıynsha departamenti QR QK 311-babynyń 1-bólimi (para alý) boıynsha 2014 jylǵy 26 shildede «Astana-Energııa» (100% memlekettiń úlesi) AQ basqarma tóraǵasy Q. degen azamatqa qatysty jeńildetilgen sotqa deıingi óndiris boıynsha qylmystyq is qozǵady. Ol aýdanaralyq ekonomıkalyq sotqa taýarlardy ýaqytynda jetkizbegeni úshin bergen shaǵym boıynsha shara qoldanbaý úshin «A.» JShS-niń menedjeri Ú. degen azamatshadan 850 myń teńge para alý kezinde ustaldy», - dep jazylǵan Qarjy polıtsııasynyń habarlamasynda.
