Astana emhanalarynda 360-tan astam adamǵa tegin keńes berildi
ASTANA. 13 qyrkúıek. QazAqparat - Elorda emhanalarynda ashyq esik kúnderi ótkizilip, onda 360-tan astam adamǵa keńes berildi.
Bul týraly astana.kz saıtyna qalalyq Densaýlyq saqtaý basqarmasynan habarlady.
Eki kún boıy jas juptar men otbasylarǵa salaýatty ómir salty men reprodýktıvti densaýlyqty qorǵaý erejeleri boıynsha tegin konsýltatsııalar berildi. Emhanalarda psıholog, pedıatr, gınekolog, terapevt dárigerleriniń kómegin alý úshin jastarǵa jeke kabınetter bólindi.
Budan basqa, medıtsına qyzmetkerleri «Otbasydaǵy konstrýktıvti qarym-qatynas mashyqtary» taqyrybynda kommýnıkatıvti trenıng ótkizdi. «Balalarǵa qaýip tónse...» taqyrybynda aqparattyq-bilim berý materıaldary, «Sizdiń qorǵaý quqyǵyńyz» áıelderge arnalǵan eskertpe kómek quraly taratyldy. Sonymen qatar, jastar úshin «Otbasyn josparlaý ortalyǵy» kabıneti de ashyldy.
Іs-sharanyń maqsaty - jastarǵa, otbasy qurǵandarǵa nemese otbasyn qurýdy josparlap otyrǵandarǵa aqparattyq-bilim berý, sonyń ishinde medıtsınalyq kómek kórsetý, áleýmettik mańyzdy aýrýlardyń aldyn alý jáne týyndaý táýekelin azaıtý máseleleri boıynsha járdemdesý.
