Astana emhanalary uzartylǵan jumys kúnine kóshýi múmkin
Olar Óndiris turǵyn alabyndaǵy «Senim» otbasylyq-dárigerlik ambýlatorııasynda boldy. Kezdesý barysynda dárigerler kúndelikti jumystary, patsıentterdiń densaýlyǵy jáne medıtsınalyq qyzmetterdi usynýdyń jańa joldary týraly baıandady.
Qala ákimdiginen málim etkendeı, kezdesý barysynda dárigerler sondaı-aq 2016-2019 jyldarǵa arnalǵan QR «Densaýlyq» memlekettik baǵdarlamasyn júzege asyrý aıasynda alǵashqy medıko-sanıtarlyq kómek kórsetý baǵyttary boıynsha oı bólisti.
Qazirgi kezde «Senim» medıtsınalyq ortalyǵy 13 785 adamǵa, sonyń ishinde 3 985 balaǵa qyzmet kórsetedi. Shtattyq kestede 6 dáriger, 18 medıtsına qyzmetkeri bekitilgen.
Búginde ortalyq qyzmetkerleri patsıentter týraly jazbalardy qaǵaz jáne elektrondy túrde júrgizýde.
Densaýlyq saqtaý mınıstri qaǵazbastylyqty azaıtý maqsatynda densaýlyq saqtaý salasyna ınteroperabeldi jáne aqparattandyrý tuǵyrnamasyn engizý qajettiligin eskertti, sondaı-aq birtindep ár azamatqa elektrondy densaýlyq tólqujatyn engizý boıynsha óz pikirin bildirdi.
Áset Isekeshevtiń aıtýynsha, máseleni sheshý úshin patsıenttiń biryńǵaı elektrondy medıtsınalyq kartasyn engizý boıynsha joba pılottyq rejimde pysyqtalýda. Aldaǵy ýaqytta bul júıe Astananyń barlyq emhanalarynda engizilmek.
Sonymen qatar, vedomstvo basshysy men qala ákimi № 5 jáne №10 qalalyq emhanaǵa, ortalyq jol aýrýhanasyna at basyn tiredi.
Kezdesý barysynda kórsetiletin medıtsınalyq qyzmetterdiń sapasy men qoljetimdiligin jaqsartý boıynsha usynystar talqylandy. Atap aıtqanda, medıtsınalyq kómekke barynsha qoljetimdilikti qamtamasyz etý úshin «shaǵyn gabarıtti» BMSK uıymdaryn keńeıtý, olardyń jumys kestesin ózgertý, sall-ortalyqtardyń jumysy arqyly aqparatty qoljetimdi etý kerek.