Astana emhanalary sáýirde tolyqtaı dárimen qamtamasyz etildi
Baspasóz málimetterine qaraǵanda, sonymen qatar dáriler ShQO, Almaty oblysyna jáne Almaty qalasyna tolyq jóneltildi. Bul óńirlerde dárilerdi jóneltý jospary 99% oryndaldy. Elimizdiń medıtsınalyq uıymdarynda dárilik zattardy jetkizý jalǵasýda.
Emhanalardyń ótinishterine sáıkes, elimizdegi 391 medıtsınalyq uıymǵa tegin dáriler men medıtsınalyq buıymdar berildi. Tegin dári-dárimekterdiń baǵasy - 25,6 mlrd teńgeni quraıdy.
«SQ-Farmatsııa» JShS tóraıymynyń mindetin atqarýshy Sharııa Ismuhanovanyń aıtýynsha, qazirgi tańda dárilerdiń kóp bóligi ShQO-ǵa (3,3 mlrd teńge) jóneltilgen. Almatyǵa 3,1 mlrd teńge somasyna, Qaraǵandy oblysyna 2,6 mlrd teńge, al Astana qalasy boıynsha - 2,4 mlrd teńgege dárilik zattar jiberilgen.
Biryńǵaı dıstrıbıýtor basshysy atap ótkendeı, segiz óńirde - BQO, OQO, Qostanaı, Jambyl, Aqmola, Mańǵystaý, Qyzylorda jáne Aqtóbe oblystarynda dáriler dárilik zattardy esepke alý jáne ótkizý qyzmetteri satyp alynǵan jekemenshik dárihanalyq jeliler arqyly, qalǵan segiz óńirde - Almaty, Astana, Almaty oblysy, Atyraý oblysy, Qaraǵandy oblysy, Pavlodar oblysy, sondaı-aq ShQO jáne SQO-da emhanalardaǵy dárihanalar arqyly bosatylýda.
«Qazirgi tańda qazaqstandyqtardy ambýlatorııalyq deńgeıde dárimen qamtamasyz etý úshin tizimdegi 494 túrli dárilik zat pen 421 medıtsınalyq maqsattaǵy buıym satyp alyndy. Satyp alynbaǵan dáriler boıynsha qaıta tender rásimderi ótkizilýde, qorytyndysy sáýirde shyǵarylady», - dedi Sharııa Ismuhanova.