Astana elimizdiń ınnovatsııalyq júregi - N.Nazarbaev

«Ózimniń sóılegen sózderimniń birinde men jańa elordamen baılanysty alǵashqy sheshimderimniń biri L.N.Gýmılev atyndaǵy Eýrazııa ulttyq ýnıversıtetin qurý týraly Jarlyǵym bolǵanyn erekshe atap ótkenmin. Ol 1996 jyly áli sol kezdegi Aqmolanyń elorda fýnktsııalaryn qabyldaýǵa oraı aýqymdy daıyndyqtar bas­talýymen bir mezgilde qurylǵan edi. Men úshin bul qaǵıdatty sheshim boldy. Men jańa Qazaqstan elordasyn, birinshi kezekte, elimizdiń iri ǵylymı-bilim berý ortalyǵy retinde kórdim. Sondyqtan meniń erekshe qamqor­lyǵymdaǵy másele Astananyń jumys istep turǵan joǵary oqý oryndaryn damytý jáne jańalaryn qurý boldy. Jumys istep turǵan óńirlik joo-lar nyǵaıtyldy jáne jańǵyrtyldy. Osylaısha S.Seıfýllın atyndaǵy Qazaq agrotehnıkalyq ýnıver­sıteti men Qazaq memlekettik medıtsına akademııasy (búginde - Astana medıtsına ýnıversıteti) paıda boldy. 2001 jyly Reseı basshyly­ǵy­men ýaǵdalastyq boıynsha Astanada M.V.Lo­monosov atyn­daǵy Máskeý memlekettik ýnı­versıtetiniń qazaqstandyq fılıaly ashyldy. Memlekettiń belsendi yqpalymen Astanada birqatar memlekettik emes joo-lar - Qazaq gýmanıtarlyq-zań ýnıversıteti, Qazaqstan-Reseı ýnıversıteti, Eýrazııa gýmanıtarlyq ınstıtýty jáne basqalary jumys isteı bas­tady», - dep jazady Elbasy.

Memleket basshysynyń atap ótýinshe, 2010 jyly qazirdiń ózinde ınnovatsııa­ly Qazaqstan úshin kadr­lar daıyndaýǵa baǵyt ustanǵan, Qazaqstannyń múldem jańa ǵylymı-bilim berý júıesiniń jetekshi flagmany bolyp tabylatyn Nazarbaev Ýnıversıteti ashyldy. Ol mamandardy halyqaralyq úlgi-qalyptarǵa sáıkes daıyndaıtyn, avtonomdyq pen akademııalyq erkindik qaǵıdattaryna saı jumys isteıtin tuńǵysh qazaqstandyq ýnıversıtet boldy. Nazar­baev Ýnıversıteti álemdegi 30 úzdik joǵary oqý oryndary reıtıngine kire­tin jetekshi sheteldik ǵylymı-bilim berý ortalyqtarymen yntymaqtasyp otyr.

Onyń ınjenerlik, ǵylym men tehnologııa, medıtsına, gýmanıtarlyq jáne áleýmettik ǵylymdar mektepterinde, Bıznestiń joǵary mektebinde, Memlekettik saıasattyń joǵary mektebinde, Bilim berýdiń joǵary mektebinde bir jarym myńǵa tarta stýdent bilim alýda.

Qazir Nazarbaev Ýnıversıte­tiniń ar­qaýynda Energetıkalyq zertteý­ler or­talyǵyn, Ómir týraly ǵylym­dar orta­lyǵyn, Bilim berý saıasa­ty ortalyǵyn qamtyǵan ulttyq ınnovatsııa­lyq-zııat­kerlik klaster jedel qalyptas­tyrylýda.

Qazir Qazaqstannyń barlyq iri joǵary oqý oryndarynyń jumystary Nazarbaev Ýnıversıteti úlgisi boıynsha qurylyp, soǵan uqsas­tyryla júrgizilýde.