Astana elimizdegi ekonomıkalyq jańǵyrýdyń lokomotıvi bola alatyn barlyq alǵysharttarǵa ıe - S. Ahmetov
Búgin VI Astana ekonomıkalyq forýmy aıasynda ótip jatqan «Astana Invest-2013» ІV Halyqaralyq ınvestıtsııalyq forýmy barysynda QR Premer-Mınıstri Serik Ahmetov osylaı málim etti.
«Eýrazııa kindiginde yńǵaıly geografııalyq aýmaqta ornalasqan Astana aýqymdy kommýnıkatsııalyq múmkindikterdi onan saıyn arttyrý áleýetine ıe. Bas qala elimizdiń ortalyǵyna kóshirilgeli beri ondaǵy halyq sany 3 esege artty jáne búgingi tańda 700 myńnan asty. Osynyń ózi Astananyń demografııalyq, tutynýshylyq áleýetiniń aýqymy zor ekenin bildiredi. Sondyqtan da, elordanyń ekonomıkalyq múmkindikterin barynsha paıdalaný mańyzdy. Jalpy alǵanda Astana ekonomıkalyq jańǵyrý, elimizdegi eń ozyq tehnologııalar engizýdiń lokomotıvi bola alatyn barlyq alǵysharttarǵa ıe», - dedi Úkimet basshysy.
Onyń aıtýynsha, sońǵy jyldary elimizde isker ortany jaqsartýǵa qatysty mańyzdy qadamdar jasaldy. Kásipkerlikti qoldaý men jaǵymdy ınvestıtsııalyq ahýal qalyptastyrýǵa barynsha mán berildi.
«Onyń ishinde, bıznes-bastamalardy júzege asyrý úshin jaǵymdy fıskaldy sharttar qalyptasty. Ruqsat berý júıeleri júıelenip, ońtaılandyryldy. Bıylǵy jyly salyqtyq ákimshilendirýdiń naqty qadamdary jasaldy», - dedi S. Ahmetov.
