Astana eldiń saıası ortalyǵy bolǵandyqtan ónerkásiptik óńir retinde damytylmaıdy - I.Tasmaǵambetov

Astana qalasynyń aldaǵy 2011-2015 jyldarǵy damý baǵdarlamasynyń jobasyn qarastyrý barysynda depýtat Ermek Ospanov: «Erteńgi kúni elordalyq kásiporyndar Kedendik odaq sheńberinde reseılik jáne belarýstik ónimdermen básekelese alady ma?», - degen saýalyn qoıdy.

Suraqqa jaýap bergen I.Tasmaǵambetov: «Astana eldiń saıası ortalyǵy ekendigi san márte aıtylyp keledi. Sondyqtan ónerkásiptik óńir retinde ol damytylmaıdy. Bizde óńirlik jalpy ónimniń (ÓJÓ) 62 paıyzyn shaǵyn jáne orta bıznes quraıdy. Aldaǵy jospar ony 80-ge jetkizý. ÓJÓ-niń 22 paıyzyn qurylys quraıdy. Biraq ol tómendeý úrdisine qaraı jyljıtyn bolady. Sebebi sońǵy bes jyldaǵydaı qalada qarqyndy qurylystar bolmaıdy. Turǵyndardyń sany da 700 myńǵa jetti. Іshki kóshi-qonnyń esebinen bul sannyń aldaǵy ýaqytta 1 mln. 100 myńǵa jetýi yqtımaldyǵyn joqqa shyǵarmaımyz. Soǵan sáıkes, shaǵyn jáne orta bıznes te damı túspek. Al ónerkásiptik salaǵa keletin bolsaq, Elbasynyń tapsyrmasyna sáıkes qalada ındýstrııalyq park damýda», - dedi.

Ákimniń aıtýynsha, búginde 600 gektar jerge qazyǵyn qaqqan ındýstrııalyq parktyń ınjenerlik ınfraqurylymy 90 paıyzǵa oryndaldy. Oǵan engen jobalardyń alǵashqysy - «Lokomotıv qurastyrý zaýyty» byltyr iske qosylyp, qazir qarqyndy jumys isteýde. Indýstrııalyq park aýmaǵynda jalpy quny 500 mln. AQSh dollary bolatyn barlyǵy 150 kásiporyn turǵyzý kózdelip otyr. parkty ınvestıtsııalyq jobalarmen tolyqtyrý maqsatynda Úılestirý keńesiniń sheshimimen park aýmaǵynda 27 ınvestıtsııalyq joba júzege asyrylatyn bolady. Onyń úsheýi - serpindi jobalar.

Tasmaǵambetovtyń pikirinshe, Astanada qazir jumys istep turǵan kásiporyndar zamanaýı qondyrǵylarmen jabdyqtalǵan. Sondyqtan shyǵarylǵan ónimder sapaly, óz kezeginde básekege qabiletti bolatyndyǵyna senimi mol ekendigin bildirdi.