«ASTANA EKSPO» kompanııasynan 10 mlrd teńgeden astam qarajat urlanǵan - Q. Qojamjarov
ASTANA. QazAqparat - «ASTANA EKSPO» -kompanııasynan 10 mıllıard teńgeden astam qarajat urlanǵan. Bul týraly búgin Májilisiniń jalpy otyrysy barysynda jýrnalısterge bergen suhbatynda Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Qaırat Qojamjarov málim etti.
Agenttik tóraǵasynyń aıtýyna qaraǵanda, «Astana EKSPO» kompanııasynyń burynǵy laýazymdy tulǵalaryna qatysty is boıynsha sotqa deıingi tergeý aıaqtaldy. Qazirgi kúni jemqorlyq qylmysymen aıyptalýshylardy qylmystyq is materıaldarymen tanystyrý úderisi júzege asýda. «Tutastaı alǵanda osy is boıynsha 24 tulǵa tergelýde, al ıelený arqyly urlanǵan soma jalpylama alǵanda 10 mlrd 200 mln teńgeden asady. Sonyń ishinde Ermegııaev myrzanyń tikeleı 4 mlrd 200 mln teńgeni ıelengeni dáleldenip otyr. Bul rette EKSPO-nyń aqshalaı qarajaty esebinen aktıvter alý sekildi máseleler de bar ekenin eske salamyn», - dedi Q. Qojamjarov.
Onyń sózine qaraǵanda, sybaılas jemqorlyqqa qatysty aıyptalýshylar EKSPO-ǵa bólingen aqshalaı qarajatqa turǵyn úıler, avtokólikter, qonaq úı keshenderin satyp alǵany anyqtalǵan.
