«Astana EKSPO-2017» kompanııasynyń eks-basshysy T.Ermegııaevti úı qamaýynda ustaý merzimi uzartyldy
ASTANA. QazAqparat - «Astana EKSPO-2017» Ulttyq kompanııasynyń burynǵy basshysy Talǵat Ermegııaevti úı qamaqta ustaý merzimi qarasha aıyna deıin uzartylǵan. Bul týraly búgin Senatta jýrnalısterge bergen suhbatynda QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Alık Shpekbaev málim etti.
«Oǵan úı qamaýynda ustaý merzimi uzartyldy. Qazir ispen tanysý protsesi júrip jatyr. Meniń bilýimshe, merzim qarasha aıyna deıin uzartylǵan», - dedi agenttik tóraǵasynyń orynbasary. Aıta keterligi, qazirgi ýaqytta atalǵan is boıynsha 8-den asa kúdikti ózderine taǵylǵan aıyp negizindegi is materıaldarymen tanysyp shyqqan. Bul olardyń quqyǵynyń biri. «Sonymen birge eger olar ispen tanysý merzimin qasaqana sozatyn bolsa, onda belgili bir keste jasalady, bul da prokýratýranyń kelisimimen. Árıne, eger olar bul máseleni ádeıi soza túsetin bolsa», - dep túsindirdi Alık Shpekbaev. Esterińizge sala keteıik, «Astana EKSPO-2017» Ulttyq kompanııasynyń burynǵy basshysyna QR QK-niń 176-babynyń 4-bóligindegi «b» tarmaqshasymen qarastyrylǵan aýyr qylmystardy birneshe ret qasaqana jasady degen kúdik keltirilgen edi. 12 maýsymda Astana qalasyndaǵy №2 Almaty aýdandyq sotynyń sheshiminen Talǵat Ermegııaev 2 aılyq merzimge úı qamaýyna alynǵan bolatyn. Al buǵan deıin úı qamaýynda ustaý merzimi birneshe ret uzartylyp keledi.
