Astana ekonomıkasyna jyl basynan beri 519,9 mlrd teńge tartyldy
ASTANA. QazAqparat - Ekonomıkanyń bazalyq salasy boıynsha 7 aıdaǵy eseptik málimetterdiń taldaýy oń nátıjeli dınamıkany kórsetti, dep habarlaıdy elorda ákimdiginiń resmı saıty.
Sonymen ónerkásiptiń ósimi 3,1% (331,6 mlrd teńge) qurady, onyń ishinde óńdeýshi ónerkásiptiń ulǵaıýy 3,5%.
Aı saıyn ınvestıtsııanyń da ósimi baıqalady: jyl basynan beri 519,9 mlrd teńge tartyldy.
Sheteldik ınvestıtsııanyń úlesi 2017 jylǵy sáıkes kezeńmen salystyrǵanda 10,5%-dan 27,1% deıin ósti.
Bıýdjetten tys ınvestıtsııanyń ósimi 2017 jyly qańtar-shildede 342,4 mlrd teńgeden 2018 jyldyń qańtar-shildesine deıin 461,3 mlrd ósti. Onyń negizgi kapıtaldaǵy ınvestıtsııa kólemi 88,7% paıyzdy qurady.
Shaǵyn jáne orta bıznes salasynda qoldanystaǵy sýbektilerdiń sany 10,5% (107,9 myń birlik) ulǵaıdy.
ShOB sýbektileri óndirgen ónimniń kólemi 2018 jyldyń birinshi toqsanynyń qorytyndysy boıynsha 6,8%-den 908,8 mlrd teńgege deıin ósti. ShOB sýbektilerinen bıýdjetke túsken salyq 214 mlrd teńgeni (nemese jalpy salyq túsimi men tólem 46%) qurady.
Osylaısha shaǵyn jáne orta bıznesti belsendi qoldaýdyń arqasynda Astanada orta eseppen 1400 jańa shaǵyn jáne orta bıznes sýbektileriniń kásiporny ashyldy.
Saýdany damytýdyń da oń trendi baıqalǵan - 3,6%-ǵa ósken, jalpy kólemi 650,8 mlrd teńgeni qurady.
Ekonomıkanyń shynaıy sektorynda 12 656 jańa jumys orny quryldy, bul ótken jylǵy kezeńmen salystyrǵanda 16,5% kóp (108565 jańa jumys orny), onyń ishinde 10 887 (86% úlesi) - ShOB salasy.
ІІ toqsandaǵy jumyssyzdyq deńgeıi 4,5% qurady.
Bıýdjettiń tabys bóligine qatysty memlekettik bıýdjetke túsimniń kólemi 1 tamyzda 556,2 mlrd teńgeni qurady (2,3% artqan).
Turǵyn úıdi paıdalanýǵa berýdiń TIK-i 90,1% qurady. Paıdalanýǵa 1 mln 516 myń sharshy metr turǵyn úı berildi (bir jylǵa jospar - 2 362 myń sharshy metr).
Turǵyn úıdi paıdalanýǵa berýdiń ósim qarqyny aı saıyn ulǵaıýda, shildede 235 myń sharshy metr salyndy, bul maýsym aıyna qaraǵanda (205 myń sharshy metr) 14,8% kóp.
TIK qurylys jumystary 80,9% (257,2 mlrd teńge, bir jylǵa jospar - 661,5 mlrd teńge) qurady. Ótken jyly joǵary bazadaǵy kórsetkishtiń tómendeýi EKSPO-2017 qarsańynda nysandardy paıdalanýǵa berý men qurylystyń (jańa temirjol vokzaly, halyqaralyq áýejaı termınaly, Mega Silkway iri saýda ortalyǵy, álemdik deńgeıdegi qonaq úılerdiń salynýy) belsendi qarqynyna baılanysty boldy.
Sonymen qatar aı saıyn (qańtar-maýsym) qurylys jumystary kóleminiń oń dınamıkaly ósimi baıqaldy.
Kórsetkishterdi ekinshi jarty jyldyqta jaqsartýdy ınvestıtsııalyq ınfraqurylym jobalarynyń esebinen iske asyrý josparlanýda.
Ekinshi jarty jyldyqta birqatar iri jobalardy iske asyrý jalǵasýda: LRT jańa transport júıesi, nóser kárizi qurylysy, JEO-2, JEO-3, jol qurylysy, kópqabatty turǵyn úı keshenderi men basqa da obektiler. Jyl sońyna deıin 470,5 mlrd teńgeden astam somaǵa jobalardy iske asyrý josparlanǵan.
