Astana ekonomıkalyq sotyna І jartyjyldyqta 6 120 talap aryz tústi
ASTANA. QazAqparat - Astana mamandandyrylǵan aýdanaralyq ekonomıkalyq sotynda 2015 jylǵy birinshi jartyjyldyqtaǵy sottyń jumys nátıjesi boıynsha májilis ótti, dep habarlady qalalyq sottyń baspasóz qyzmeti.
2015 jylǵy birinshi jartyjyldyqta Astana qalasynyń mamandandyrylǵan aýdanaralyq ekonomıkalyq sotyna 6 120 talaparyz túsken, olardyń 5 694-i qaralyp, sheshim shyǵaryldy, onyń ishinde 501-i syrttaı tártipte qaraldy.
Óndiriste 6916 iske núkte qoıyldy. Osylaısha, ortasha ótken kezeńde ár sýdıa 271 sot aktisin shyǵardy.
Sot ádil sotqa qoljetimdilik qaǵıdatyn saqtaý boıynsha josparly jumystar júrgizýde. Onyń aıasynda talap aryzdy qaıtarý, qozǵalyssyz qaldyrý máseleleri sheshimin tabýda. Talap aryz qabyldaýdan negizsiz bas tartýdy joıýǵa sharalar qabyldanýda. Sonymen, ótken kezeńde sot 621 ótinishti keri qaıtardy, 113 jaǵdaıda ótinishti qabyldaýdan bas tartyldy. Bul sotqa kelip túsken ótinishterdiń 1,8 paıyzyn quraıdy.
Sot isin júrgizýge aqparattyq tehnologııalardy engizýge baılanysty «Sot kabıneti» qyzmeti arqyly elektrondyq túrde ótinish qabyldaý jumystary retke keltirip, júrgizilýde. Bul qyzmet talap aryzdardy jáne basqa da elektrondyq qujattardy qabyldaý jáne esepke alý tártibi týraly nusqaýlyqpen retteledi de jeke jáne zańdy tulǵalarǵa úıinen nemese keńseden shyqpaı-aq sotqa ótinish berýge múmkindik beredi. Bul rette memlekettik baj da elektrondyq túrde tólenetin bolady.
Sonymen, ótken kezeńde Astana qalalyq mamandandyrylǵan aýdanaralyq ekonomıkalyq sotyna 485 elektrondyq talap aryz kelip tústi.
