Astana ekonomıkalyq forýmyndaǵy taqyryptardyń halyqaralyq mańyzy óte joǵary - Aleksandr Chervıakov
«Birinshiden, bul meniń Qazaqstanǵa alǵash kelýim. Meni Astananyń ásem kelbeti, tazalyǵy tamsandyrdy. Árıne, bul álemdik deńgeıdegi astana. Bul turǵyda Astana Azııa óńiriniń qarjy naryǵyndaǵy ortalyqqa aınalýǵa ábden múmkindigi bar. Al Astana ekonomıkalyq forýmynyń aýqymdylyǵy, ondaǵy taqyryptardyń halyqaralyq mańyzdylyǵy óte joǵary dep esepteımin. Máselen, ózim qatysqan jahandyq óńirlik rynoktardaǵy qarjylyq turaqtylyqty damytý máselelerine oraı ótken sessııanyń ózinde kóptegen mańyzdy pikirler aıtyldy. Bárimizge belgili, qazirgi kúni álemdik ekonomıkada túıindi máseleler az emes. Qarjylyq daǵdarystyń da jaǵymsyz áserinen áli tolyq aıyǵyp kete alǵan joq. Al onyń bárin álem bolyp birigip, keńesip, kelisip sheshken abzal. Al bul turǵydan búgingideı aýqymdy forýmdardyń mańyzy zor dep oılaımyn», - belarýstik sarapshy.
