«Astana» Djıro d'Italııadaǵy ekinshi jeńisine qol jetkizdi
ASTANA. 26 mamyr. QazAqparat - «Astana» veloklýbynyń kapıtany Roman Kroıtsıger «Djıro d'Italııa» sýperkópkúndiginiń 19-kezeńiniń jeńimpazy atandy.
Bul qazaqstandyq komandanyń Djırodaǵy ekinshi jeńisi. Bunyń aldynda 7-týrda «astanalyqtardyń» sapynan Paolo Tıralongo kózge túsken bolatyn.
«Bul men úshin óte mańyzdy jeńis boldy. Sebebi men birer kúnder buryn jarystan shyǵyp qalýdyń sál-aq aldynda turdym. Men qatty qaljyrap kettim, alaıda komandalas dostarym meni qoldady. Búgingi jeńis - Djırodaǵy 17-kezeńde oryn alǵan sátsizdigimnen keıingi meniń qolymnan keler istiń eń azy», - dedi márege jetken boıda R. Kroıtsıger.
Eske sala keteıik, R. Kroıtsıger 17-kezeńde óziniń qarsylastarynan 10 mınýttan astam ýaqyt qalyp qoıyp, Djıronyń júldeli ornyn jeńip alýǵa barlyq múmkindikterinen aıyrylǵan bolatyn.
Keshe R. Kroıtsıgerdiń jeńisti kúninde komandany qoldaýǵa áıgili Aleksandr Vınokýrov kelgenin aıta ketý kerek. «Astana» kóshbasshysy A. Vınokýrov 2010 jyly dál osy Alpe dı Pampeago taýly kezeńinde jeńiske jetken bolatyn.
«Bul óte aýyr taý, men ony Djıro del Trentıno jarysynan beri bilemin. Ol kezde men jeńiske jetken edim. Taýdyń ushar basy jetkizbeı qoıady, veloshabandozdardy óte qatty qaljyratyp jiberedi. Roman osy jeńisimen óziniń chempıon ekendigin dáleldedi, onyń boıynda minez bar», - dep atap kórsetti A. Vınokýrov.
R. Kroıtsıger 19-kezeńde úzdik atandy. 195 shaqyrymǵa sozylǵan jolda sportshylar joǵary dárejeli 3 taýly bólikterdi artqa tastady. Sonyń biri - Alpe dı Pampeago taýynda máre syzyǵy ornalasty. Astanalyq sportshy kezeńniń orta tusynda álsizdik tanytqandaı boldy. Komandanyń Djırodaǵy kapıtany bolyp tańdalǵan 26 jasar cheh veloshabandozy trassadan shyǵyp qalýy múmkin degen kúdikter paıda boldy. Alaıda Roman kómbege jaqyndar tusta óz boıynan kúsh taýyp, qarsylastaryn 3 shaqyrymǵa deıin ozyp ketti. Oǵan komandalastary Andreı Zeıts pen Kevın Zeelders kómektesti. Olar oılastyrylǵan taktıka boıynsha jarys barysynda pelotonnan uzap ketken bolatyn.
R. Kroıtsıgerden keıin «Garmın» komandasynyń múshesi Raıder Hesedal ekinshi keldi. Djıronyń jalpy esebinde birinshi kele jatqan Hoakım Rodrıgez úshinshi oryn aldy.
Búgin Italııada 219 shaqyrymǵa sozylǵan jarystyń sońǵy taýly kezeńi ótedi. Peloton 2 757 metrlik Passo Dello Stelvıo atty eń bıik taýdy baǵyndyrady.
