Astana-Dýshanbe baǵytynda tikeleı áýe reısi ashylýy múmkin

ASTANA. QazAqparat - Búgin Qazaqstannyń Tájikstandaǵy Elshisi Nurlan Seıtimov tájik eliniń Kólik mınıstri Hýdoer Hýdoerzodamen kezdesti, dep habarlaıdy QazAqparat.

Kezdesý barysynda Qazaqstan men Tájikstannyń kólik salasyndaǵy ekijaqty ózara is-qımyl máseleleri talqylanyp, qazaq elordasynda ótetin «EKSPO-2017» halyqaralyq mamandandyrylǵan kórmesi qarsańynda Astana-Dýshanbe  baǵdary boıynsha tikeleı áýe reısin ashý jaıy qaraldy. Sonymen qatar elshi Seıtimov «Qazaqstan temirjoly» UK» AQ pen Tájikstan temirjoly arasyndaǵy yntymaqtastyqtyń qarqyny joǵary ekendigin atap ótti.

"Eki jaqty kezdesýden keıin tájik mınıstrine júzdeskeni úshin rızashylyǵyn  bildirgen qazaqstandyq dıplomat eki eldiń arasyndaǵy  qarym-qatynastardy strategııalyq seriktestik rýhynda odan ary nyǵaıtý barysyndaǵy jemisti yntymaqtastyqqa daıyn ekendigin basa aıtty", - delingen Qazaqstannyń Tájikstandaǵy Elshiligi aqparatynda.