«Astana-Dýatlon-2018» jarysy ótti
ASTANA. QazAqparat - Búgin elordada ótken «Astana-Dýatlon» jarysyna 500-den astam adam qatysty, dep habarlaıdy QazAqparat tilshisi.
Jarysqa 16 jastan bastap barlyq azamattardyń qatysý múmkindigi boldy. Jarys úsh kezeńnen turdy: 5 shaqyrymǵa júgirý, 20 shaqyrymǵa velojarys jáne 2,5 shaqyrymǵa júgirý.
Jarystyń úsh kezeńinen súrinbeı ótken qatysýshylardyń ishinde QR Prezıdent Ákimshiliginiń jetekshisi Ádilbek Jaqsybekov, «Tsesnabank» AQ Dırektorlar Keńesiniń tóraǵasy Dáýren Jaqsybek, Astana qalasynyń mádenıet jáne sport basqarmasynyń bastyǵy Bolat Majaǵulov, Astana fýtbol federatsııasynyń basshysy Málik Hasenov, «Alaý» muzaıdyny kesheniniń dırektory Sanat Shapashov bar.
Aqtyq márege jetken qatysýshylardy Astana qalasy ákiminiń orynbasary Ermek Amanshaev quttyqtap, baǵaly syılyqtar jáne medaldarmen marapattady.
Odan bólek, «Astana-Dýatlon 2018» qatysýshylary arasynda lotereıa bıletteri oınatylyp, baǵaly syılyqtar utysy boldy.
Shara Astananyń 20 jyldyǵyna oraı, qalalyq mádenıet jáne sport basqarmasynyń uıymdastyrýmen jáne Astana trıatlon federatsııasynyń qoldaýymen ótkizildi.
