«Astana»-«Dınamo-Kıev» matchy: Elordada kólik qozǵalysy shekteledi
ASTANA. QazAqparat - Búgin «Astana Arena» stadıonynda «Astana» men «Dınamo-Kıev» (Ýkraına) fýtbol klýbtarynyń kezdesýi ótedi. Osyǵan oraı, qalanyń birqatar kóshesinde kólik qozǵalysy shekteledi, dep habarlaıdy QazAqparat tilshisi.
ÝEFA Eýropa lıgasynyń toptyq kezeńiniń besinshi týr oıyndary saǵat 21.45-te bastalady.
«Kereı men Jánibek kóshesinen Uly dala dańǵylyna deıin Turan jáne Qabanbaı batyr dańǵyldarynda jol qozǵalysy shekteledi. Jol qozǵalysynyń qaýipsizdigin qamtamasyz etý maqsatynda qoǵamdyq kólikterge basymdyq beriledi», - delingen Polıtsııa departamentiniń habarlamasynda.
Sonymen birge, Polıtsııa departamenti júrgizýshilerge jeke avtomobılderdi úıde qaldyryp, qoǵamdyq kólikke minýge keńes beredi. Astana áýejaıyna jáne sol mańdaǵy eldimekenderge baratyn turǵyndar da aldyn ala ózge marshrýtty tańdaǵandary jón.
«Kórermenderge qolaıly bolýy úshin saǵat 20.00-21.00 aralyǵynda jolaýshylardy stadıonǵa aparatyn shattl-avtobýstar jumysy uıymdastyrylady. Olar Astananyń úsh aýdanynan - «Qazaqstan» sport kesheni avtoturaǵynan, «Nur Astana» meshitiniń avtoturaǵynan jáne astanalyq tsırktiń avtoturaǵynan qatynaıdy», - deıdi departamenttiń baspasóz qyzmeti.
Fýtbol matchynan keıin kórermenderdi qalaǵa alyp qaıtatyn avtobýstar «Astana Arena» stadıonynyń birinshi jolaǵyna keledi. Odan bólek, qalaishilik avtobýstar qalypty keste boıynsha júredi.
