Astana – Delı baǵyty boıynsha jańa reıs ashylady

ASTANA. KAZINFORM – Úndistan men Qazaqstan astanalary arasynda jańa marshrýt iske qosylady.

QR Kólik mınıstrligi ushý geografııasyn keńeıtý jáne elimizdiń áýe tasymaldar naryǵyndaǵy sheteldik «loý-kost» áýe kompanııalardyń úlesin ulǵaıtý boıynsha jumys jalǵasyp jatqanyn málimdedi.

5 aqpanda Qazaqstannyń avıatsııalyq bıligi Astana qalasynyń halyqaralyq áýejaıy ókilderiniń qatysýymen «Indigo» Úndi «loý-kost» áýe kompanııasynyń basshylyǵymen kezdesý ótkizdi.

Osy jyldyń 14 mamyrynan bastap «Indigo» áýe kompanııasy Astana – Delı baǵyty boıynsha jańa baǵyt ashýdy josparlap otyr. Reıster A-320/321 tıpti áýe kemelerinde aptasyna 3 ret jıilikpen oryndalady.

Qazaqstan men Úndistan astanalary arasynda tikeleı reıstiń ashylýy elder arasyndaǵy yntymaqtastyqty odan ári damytýǵa jáne eldiń tranzıttik áleýetin damytýǵa yqpal etetin bolady. Sonymen qatar buǵan deıin habarlanǵandaı, «Eır Astana» qazaqstandyq áýe kompanııasy osy jyldyń 20 sáýirinen bastap «Airbus» úlgisindegi áýe kemesinde aptasyna 3 ret jıilikpen Almaty – Mýmbaı baǵyty boıynsha Úndistanǵa reıster ashady.

Jalpy, kóktemgi-jazǵy navıgatsııa kezeńinde elder arasyndaǵy jolaýshylar reısteriniń 5 áýe baǵyty boıynsha aptasyna 24 reıske deıin ulǵaıtý josparlanǵan. Qazir turaqty áýe qatynasy Almaty – Delı («Eır Astana» - aptasyna 7 reıs, «IndiGo» - aptasyna 7 reıs), Almaty – Goa (SCAT – 2), Astana – Goa (FlyArystan – 2) baǵyttary boıynsha oryndalady.

Almatydan Mýmbaıǵa tikeleı reıs ashylatynyn jazǵan bolatynbyz.