Astana deklaratsııasynyń róli qazirgi geosaıası jaǵdaıda da mańyzdy - Asqar Shákirov

ASTANA. QazAqparat - Parlament Senaty tóraǵasynyń orynbasary Asqar Shákirov Helsınkı qalasynda ótken «Ózgeris ústindegi Eýropalyq qaýipsizdik kelbetindegi EQYU jáne onyń Parlamenttik Assambleıasynyń róli» atty halyqaralyq kezdesýge qatysty, dep habarlaıdy QazAqparat.

Kezdesýge qatysýshylar qazirgi zamanǵy halyqaralyq kún tártibindegi EQYU-nyń róli men uıymnyń óz áleýetin iske asyrýdaǵy kedergilerge baılanysty ózekti máselelerdi talqylady. EQYU-nyń ishki reformasyna erekshe nazar aýdaryldy.

Bul uıymnyń 2025 jylǵy mereıtoılyq sessııasyna daıyndyq kezeńi «Áreketke shaqyrý - Helsınkı+50» protsesin damytý sharasy bolyp sanalady. Sessııada bolashaqtaǵy eýropalyq qaýipsizdik kelbetiniń kórinisi men ondaǵy Parlamenttik Assambleıanyń rólin kórsetetin qorytyndy qujat qabyldanatyn bolady.

Osy protsess aıasynda Assambleıanyń jumys tobynyń quramyndaǵy Senat tóraǵasynyń orynbasary 2010 jyly qabyldanǵan Astana deklaratsııasynyń róline áriptesteriniń nazaryn aýdardy. Dúrbeleńge toly geosaıası jaǵdaıda da onyń mańyzy saqtalyp keledi jáne halyqaralyq qoǵamdastyqtyń EQYU aımaǵynda beıbitshilik pen qaýipsizdikke qol jetkizý jónindegi kúsh-jigerine zor úles qosady.

Sharaǵa EQYU Parlamenttik Assambleıasynyń keńeıtilgen Bıýrosynyń músheleri, Fınlıandııa Parlamentiniń depýtattary, sondaı-aq sarapshylar qaýymdastyǵynyń ókilderi qatysty.

Foto: senate.parlam.kz