Astana dárigerleri qalada «A» vırýstyq gepatıti dertiniń órshıtindigin boljaýda

Búgin Astana ákimdiginde ótken densaýlyq saqtaý salasynyń mamandary men múddeli organdardyń basqosýynda sóz alǵan qalalyq Sanepıdqadaǵalaý departamenti bastyǵynyń orynbasary Sarhat Beısenovanyń aıtýynsha, elordada «A» vırýstyq gepatıt aýrýy tsıkldyq sıpatta kórinis tabady.

«Bul dertti juqtyrý oqıǵalary qalada 2-3 jyl boıyna tómen deńgeıde bolsa, kelesi 2-3 jylda mindeti túrde joǵarylap otyrady. 2010 jáne 2011 jyldary bizdiń aımaq úshin - «A» vırýstyq gepatıttiń tsıkldyq joǵarylaý kezeńderi», - dedi S. Beısenova.

Onyń atap kórsetkenindeı, «A» gepatıti tsıkldyq órshýden bólek, kúzgi-qysqy kezeńderde de beleń alatyn úrdiske ıe. Soǵan baılanysty dárigerler qaýymy osy máselege alańdaýshylyq bildirip otyr.

Taratylǵan málimetke qaraǵanda, syrqatqa shaldyǵý kóbinese 2-9 jas aralyǵyndaǵy balalar arasynda kezdesedi. Sondyqtan Qazaqstanda 2 jastaǵy balalarǵa gepatıtke qarsy egý aqysyz júrgiziledi. Ol úshin 61,6 mln. teńgege vaktsına satyp alynǵan.

«A» vırýstyq gepatıt dertin juqtyrýdyń joǵary kórsetkishi Mańǵystaý, Qyzylorda, Ońtústik Qazaqstan, Jambyl jáne Almaty oblystarynda tirkelýde.

«1999-2000 jyldary bastalǵan jappaı vaktsınatsııadan keıin, bul aýrýǵa shaldyqqandardyń sany 50 esege azaıdy. Balalar arasynda 80 paıyzǵa tómendedi», - deıdi Astana qalasynyń densaýlyq saqtaý departamenti bastyǵynyń orynbasary Laýra Ahmetnııazova.

Onyń aıtýynsha, bıylǵy jyldyń 9 aıynda Astanada «A» vırýstyq gepatıti dertin juqtyrýdyń 73 oqıǵasy tirkelgen. Onyń 33-i - balalar.

«Aýrýdy aldyn alý úshin eldi mekenderdegi sanıtarlyq jaǵdaıdy jaqsartyp, halyqty taza sýmen qamtamasyz etý qajet. Sonymen qatar balalar arasynda dertke qarsy egý jumystaryn júrgizý kerek», - dep atap kórsetti ol.