Astana dárigerleri: Jaraqatpen keletin balalar sany artyp barady
ASTANA. KAZINFORM — Elordada balalardyń qaýipsizdigin qamtamasyz etý boıynsha aýqymdy profılaktıkalyq jumys júrgizilip jatyr, dep habarlaıdy qala ákimdiginiń baspasóz qyzmeti.
Bul týraly Astana qalasy kommýnıkatsııalar qyzmetinde ótken brıfıngte qalalyq Tótenshe jaǵdaılar departamentiniń tótenshe jaǵdaılardyń aldyn alý basqarmasynyń basshysy Qýanysh Toqsarın, Astana qalasy Polıtsııa departamentiniń jergilikti polıtsııa qyzmeti basqarmasy basshysynyń orynbasary Qanat Nysantaev jáne № 2 kópsalaly qalalyq balalar aýrýhanasynyń medıtsınalyq bólim jónindegi dırektor orynbasary Dınat Kójekenov málimdedi.
Astana qalasynyń TJD ıývenaldy polıtsııamen, PIK tóraǵalarymen jáne eriktilermen birlese otyryp, kópqabatty turǵyn úı keshenderiniń turǵyndaryna jadynamalar taratyp, qaýipsizdik erejelerin túsindirý jumysyn júrgizip jatyr.
Qýanysh Toqsarınniń aıtýynsha, búginde mamandar 225-ten astam kópqabatty úıdi aralap, 5 500-den astam jadynama kireberister men lıftilerge ornalastyrylǵan, 18 000 turǵynǵa túsindirý jumysy júrgizilgen. Sonymen qatar, elordanyń 115 mektebinde 4 500-den astam oqýshyny qamtyǵan sabaqtar, 87 balabaqshada profılaktıkalyq shara ótkizilgen. Aqparattyq materıaldar ata-analar men turǵyn úı chaty arqyly da keńinen taratylyp keledi.
Spıker qaýipsizdik sharalaryn da atap ótti:
- Úıde kishkentaı balalar bolǵan jaǵdaıda terezeni ashyq qaldyrmańyz;
- Balalardy, ásirese tereze mańynda, qaraýsyz qaldyrmańyz;
- Moskıt tory — qaýipsizdik quraly emes, olar balanyń salmaǵyn kótere almaıdy;
- Terezelerge arnaıy qulyptar men bekitkishter ornatyńyz;
- Tereze mańyna jıhaz qoımańyz — bala oǵan shyǵyp, terezege jetýi múmkin.
Balalardyń terezeden qulaý jaǵdaılarynyń aldyn alý úshin Polıtsııa departamenti de túsindirý jumysyn kúsheıtti. Jergilikti polıtsııa qyzmeti basqarmasy basshysynyń orynbasary Qanat Nysantaev qazirgi ýaqytta ata-analarmen jumys júrgizý maqsatynda turǵyn úılerdi aralaý belsendi júrip jatqanyn aıtty.
Sonymen qatar, saıabaqtarda, skverlerde, jaǵalaýlar men saýda ortalyqtarynda qaýipsizdik erejeleri týraly jadynamalar taratylyp jatyr.
№ 2 qalalyq kópsalaly balalar aýrýhanasynyń medıtsınalyq bólim boıynsha dırektor orynbasary Dınat Kójekenovtiń aıtýynsha, 2025 jyldyń mamyr aıynda jaraqat pýnktine kúnine shamamen 400 bala júgingen.
— Jazǵy maýsymda bul kórsetkishtiń artýy boljanyp otyr. Jalpy alǵanda, aýrýhananyń statsıonaryna kúnine 900-ge deıin, keı kúnderi 933 balaǵa deıin túsedi. Balalar jaraqatynyń ósýine negizgi sebepter — ýrbanızatsııa, balalar sanynyń kóbeıýi jáne kólik qozǵalysynyń artýy, — dedi ol.
Dárigerler men mamandar ata-analardy balalardyń qaýipsizdigine asa jaýapkershilikpen qaraýǵa jáne yqtımal qaýip-qaterlerdiń aldyn alýǵa shaqyrady.
Budan buryn Qaraǵandyda eki jasar bala terezeden qulap, mert bolǵanyn jazǵanbyz.