«Astana» Danııanyń «Mıdtıýlland» komandasyn jeńip jatyr
ASTANA. QazAqparat - «Astana» óz alańynda ÝEFA Chempıondar lıgasynyń ekinshi irikteý kezeńi aıasynda Danııanyń «Mıdtıýlland» komandasymen oınap jatyr, dep habarlaıdy QazAqparat tilshisi.
«Astana» irikteý kezeńiniń birinshi raýndy aıasynda Chernogorııanyń «Sýteska» komandasyn orta jolda qaldyrdy. Óz alańynda penaltıden soǵylǵan jalǵyz goldyń kómegimen jeńse, syrt alańda 2:0 esebimen basym túsken bolatyn.
Elordalyq ujym «Mıdtıýlland» komandasyna qarsy alǵashqy oıyndy óz alańynda, «Astana Arena» stadıonynda ótkizgendikten ári eýrokýboktardaǵy tájirıbesi qarsylasyna qaraǵanda kóbirek bolǵandyqtan, ony fýtbol mamandary favorıt retinde kórsetken bolatyn. Alaıda oıynnyń alǵashqy mınýttarynda bul basymdyq baıqala qoıǵan joq. Ara-tura uıymdastyrylǵan shabýyldar da nátıjesiz aıaqtala berdi. Keıde elordalyq ujymnyń shabýyly mardymsyz bolyp jatty, al keıde dattardyń qorǵanys shebi, dáliregi, Hansen-Sanne-Svıatchenko úshtigi qaltqysyz óner kórsetti. Qaýipti shabýyldardyń azdyǵynan, qonaqtar «Astana Arenada» ózderin erkin sezine bastady. Tipti, keıde drıblıng jasaýǵa da batyly bara bastady.
Astanalyqtar da osy erkinsinýdi kútkendeı eken, 31-mınýtta alań ortalyǵynda dop alǵan 6-shy nómirdegi Laslo Klıaınhaısler qarsylastyń qorǵanys shebinde paıda bolǵan bos keńistikti utymdy paıdalanyp, aıyp alańyna jaqyndaı bergende, dopty pármendep soqty. Qarsylastar qaqpashysy Iesper Hansen kúshti soqqyny qaıtarýǵa dármensiz bolyp shyqty - 1:0.
Goldan jigerlengen jergilikti komanda 1-taımnyń aıaǵyna deıin esepti eseleı túsýge áreket jasady. Biraq qonaqtardyń qorǵanysy úziliske deıin basqa gol jibermedi. Rýmynııalyq tóreshi Radý Petreský birinshi taımnyń aıaqtalǵanyna belgi berdi.
