Astana Dakar Team 2-3 jyldyń ishinde Dakardyń eń úzdik komandalary qataryna shyǵady - Artýr Ardavıchýs
ASTANA. 4 shilde. QazAqparat - Astana Dakar Team komandasyn aldaǵy 2-3 jylda Dakar jarysynda kóshbasshy komandalardyń birine aınaldyrý josparlanýda.
Bul týraly búgin Astanada ótken baspasóz máslıhatynda komanda jetekshisi Artýr Ardavıchýs málim etti.
"Men komandany 2-3 jyldyń ishinde Dakardyń kóshbasshylyq pozıtsııasyna shyǵaramyz dep senemin. Bul bizdiń jańa tujyrymdamanyń basty maqsaty", - dep atap kórsetti ol.
"Biz "Astana" Prezıdenttik kásibı sport klýbynyń qataryna ótkenimizge qýanyshtymyz. Osylaısha biz ózimizdiń moınymyzǵa budan da úlken mindetter men jaýapkershilikti aldyq dep sanaımyn. Barlyq kúsh-qaırat qazir ózimizdiń jobalarymyzdy ómirge keltirýge jáne maqsattarymyzǵa jetýge jumyldyrylýda. Astana Dakar Team úshin eń bastysy - Dakar jarysynda óte jaqsy kórsetkishterge qol jetkizý. Bul jyldyq jumysymyzdyń nátıjeli qorytyndysy bolar edi", - dep túıdi sózin A.Ardavıchýs.
