Astana Dakar «Marokko» halyqaralyq jarysynda kósh bastap keledi
ALMATY. 16 qazan. QazAqparat - Rallı-reıd boıynsha Astana Dakar komandasy eki kúndik jarys qorytyndysy boıynsha «Marokko» halyqaralyq jarysynda aldyńǵy oryndardy ıelendi.
Osylaısha, Denıs Berezovskıı basqaratyn № 311 ekıpaj T2 klasynda birinshi orynǵa jaıǵassa, al onyń komandalyq áriptesteri - Aıdyn Rahymbaev pen Baýyrjan Isabaev - márege jetkenderdiń arasynda alǵashqy ondyqqa ilikti.
«Jarystyń ekinshi kezeńi ońaı bolǵan joq, ár túrli kedergilerden ótýge týra keldi. Keshe qumnan ótsek, búgin tastar men taýlardy baǵyndyrdyq. Bul erekshe jattyǵý boldy. Eki kúndik jarystyń qorytyndysy boıynsha, bizdiń jaǵdaıymyz jaman emes - keshe óz klasymyzda ekinshi oryndaǵylardan 39 mınýtqa alǵa shyǵyp, alǵashqy nátıjeni kórsettik. Búgingi kúni biz óz nátıjemizdi jarys kezinde kezdesken kóptegen qıyndyqtarǵa qaramastan, taǵy 12 mınýtqa jaqsarttyq jáne Production (T2) klasynda alǵashqy oryndy saqtap qaldyq», - dep málimdedi D.Berezovskıı.
Denıs Berezovskıı men shtýrman Ignat Falkovtyń ekıpajy jalpy týrnırlik kestede 23-shi orynda keledi.
Sondaı-aq,T1 klasynda Astana Dakar komandasy atynan qatysatyn eki ekıpaj - A.Rahymbaev jáne B.Isabaev jarysty alǵashqy ondyq sapynda jalǵastyryp, jetinshi jáne segizinshi oryndarda keledi. Qos ekıpaj da jarysqa jańa shtýrmandarmen qatysýda. A.Rahymbaevtyń shtýrmany Konstantın Jıltsov - kezinde ataqty «Shól túlkisi» Jan-Lýı Shlesserge kómekshi bolǵan úzdik shtýrmandardyń biri, B.Isabaevtyń shtýrmany - «Dakar» jáne «Jibek joly» jarystarynda aty shyqqan otandasymyz Ǵabdolla Áshimov.
«Astana» kásibı prezıdenttik sport klýbynyń aldynda rallıdiń úshinshi kúni tur. Komanda 400-den astam shaqyrymdy ıgerýi tıis, onyń 250-i arnaıy aýmaqtar bolyp tabylady.
