Astana tsırkinde «Skıfııa» lazerlik shoýy kórsetiledi
ASTANA. QazAqparat - Qazaq memlekettik tsırki 30 jylda alǵash ret gastrolge shyqty, dep habarlaıdy QazAqparat tilshisi. Ańyzǵa aınalǵan almatylyq tsırk 9 naýryz-1 sáýir kúnderi Astanada elordanyń 20 jyldyǵyna arnalǵan SKIFIY lazerlik shoýyn qoıady.
Qoıylymdaǵy basty oqıǵalar tylsymǵa toly Skıfııa elinde ótedi jáne ondaǵy basty keıipker - Er Tóstik zulymdyqpen kúresedi. Uıymdastyrýshylardyń aıtýynsha, lazerlik shoý - tsırk ónerindegi jańa baǵyttardyń biri.
"Qoıylymda lazermen sýret salamyz. Ondaǵy klassıkalyq jáne aralas 11 nómir tutas ertegini quraıdy "Skıfııada" Er Tóstik jáne oıdan shyǵarylǵan ózge de keıipkerler bar. Olardyń kostıýmy zamanaýı jáne ulttyq ornamentter de bar. Bul arqyly biz qazaqtyń mádenıetin zamanaýı túrde kórsetkimiz keldi", - deıdi bas baletmeıster Marına Redko.
Baletmeısterdiń aıtýynsha, qoıylymda 60 adam jumys isteıdi. Ondaǵy eń kishkentaı keıipkeri - eki jasar Temirlan. Tsırk arenasynda ósip kele jatqan Temirlan "Skıfııada" bala Tóstikti somdaıdy.
