Astana tsırkinde qazaqsha kúresten ótken jarys óte tartysty boldy
ASTANA. Sáýirdiń 12-si. QazAqparat - Respýblıkalyq «Til» jýrnalynyń uıymdastyrýymen Elorda tsırkinde memlekettik qyzmetshilerdiń arasynda qazaqsha kúresten jarys ótti.
Tartysty ótken dodada barlyq qarsylastaryn jeńgen Qyzyloda oblysy, Qarmaqshy aýdanynan kelgen Jasulan Dosymov jeńimpaz atanyp, bas júldege tigilgen sheteldik avtokólikke ıe boldy, dep habarlaıdy QazAqparat.
Osy jarysta fınalǵa deıin qarsylas shydatpaı, jankúıerlerdiń yqylasyna bólengen Jambyl oblysynan kelgen Nurjan Qazybekov ekinshi oryndy ıelendi.
Jalpy, osy jarysqa 26 palýan qatysty. Kúres olımpıadalyq júıe boıynsha ótti. ıAǵnı, jyǵylǵan palýan qalady da, jeńgeni kelesi aınalymǵa ótedi.
Úshinshi oryn úshin ótken kezdesýde Aqmola oblystyq ishki ister salasynyń qyzmetkeri Nurlan Jamalov Aýyl sharýashylyǵy mınıstriligi atynan synǵa túsken Dáýlet Eskendirovten basym túsip, júldege ıe boldy.
Jarys sharty boıynsha, birinshiden, memlekettik qyzmetshi bolýy tıis bolsa, ekinshiden, palýandardyń salmaǵy 70 pen 100 keli aralyǵynda bolýy tıis. Alaıda, ótinish bildirgen eki palýannyń salmaǵy 100 keliden joǵary bolǵan. Jankúıerlerdiń qoldaýymen ol ekeýi jeke kúresti. Aıta ketsek, Prezıdenttiń Kúzet qyzmetiniń qyzmetkeri, qazaqsha kúresten Álem, Azııa jeńimpazy, túıe palýan, 109 keli Arman Ádeýov pen Іshki ister mınıstrliginiń Jol polıtsııasynyń qyzmetkeri, sambodan polıtsııalar arasyndaǵy Álem jeńimpazy, 111 keli salmaqtaǵy Talǵat Qojabekov kók kilemde beldesti. Bes mınýt boıy kúresken eki «túıe» palýannyń dodasynda aıla-tásilin asyrǵan Arman jeńiske jetip, Eýropaǵa baryp qaıtý júldesin ıelendi.
Sonymen qatar qyzyqty sátter de ótti. Oıda joq jerden jarysty júrgizýshiler jýrnalıster qaýymyn kúres alańyna shaqyrdy. «KTK» telearnasynyń operatory Nurbolat Qulmanov pen «STV» telearnasynyń Astanadaǵy tilshisi Baqytbek Hamıtulynyń kók kilemde beldesýi kóreremenderdiń qyzyǵýshylyǵyn týǵyzdy. Bastapqyda Baqytbek upaı jınap jatyr edi, degenmen Nurbolat ońtaıly sátte qarsylasyn qapy qaldyryp, taza ádis jasap, jeńiske jetti. Jarysty uıymdastyrýshylar kók kilemge taısalmaı shyqqandary úshin eki BAQ ókiline de syılyq tabys etti.
Bul sharaǵa belgili kásipker, «Qurmet» ordeniniń ıegeri Oralbek Botbaı bas demeýshi boldy.
«Ulytaý» toby, kórermenderdiń súıikti ánshileri Qydyráli Bolmanov pen Qaraqat Ábildına jáne basqa óner sheberleri kúı tartyp, án shyrqaǵanda, tilge arnalǵan kesh pen qazaq kúresiniń shyraıy kire tústi. Sonymen qatar Astana tsırkiniń ónerpazdary da óz sheberlikterin tanytty.
«Til» jýrnalynyń Bas redaktory Nurgúl Qaraǵoıshına bul sharany ótkizýdegi maqsat Elbasynyń halyqqa arnaǵan Joldaýyndaǵy buqaralyq sportty damytýǵa atsalysý ekenin málim etti.
