Astana tsırkinde «Afrıka alyptary» qaıyrymdylyq shoýy ótedi
Kórsetilimge Aqkól, Sandyqtaý, Esil jáne Úrpi aýyldaryndaǵy balalar úıiniń tárbıelenýshileri, sondaı-aq, Ana men bala Ulttyq ǵylymı Ortalyqtyń balalar onkologııasy bóliminiń emdelýshileri keledi.
Kishkentaı kórermender shoýdy tamashalap qana qoımaı, tsırk ártisteriniń jumysymen tanysady. Shoý «Bestforkids» qoǵamdyq qory belsendileriniń kómegimen ótedi. «Balalar úıiniń búldirshinderine arnalǵan mundaı sharalar balalarǵa jańa bilim alyp, tanymyn jetildirýine motıvatsııa bereri sózsiz. Atalmysh sharany ata-ana qamqorynsyz ósip jatqan balapandardy eresek ómirge daıyndaý men beıimdeýge baǵyttalǵan aktsııa desek te bolady, - deıdi «BestforKids» JF prezıdenti Saıa Kákim.
Esterińizge sala ketsek, jyrtqysh ańdardyń qatysýymen ótetin «Afrıka alyptary» shoýy 4 aqpannan bastap Astana tsırkinde óner kórsetýde.
Uıymdastyrýshylardyń pikirinshe, baǵdarlamaǵa akrobattar, áýe gımnasttary men kúlkili saıqymazaqtar kiredi. Sonymen qatar, sýmatralyq jolbarystar, aq arystandar, arqanmen júretin laq, maımyldar men kóńildi ıtter de kópshilikti óz ónerimen tánti etpek. Múıiztumsyq Bonı men kerik Bagırdiń tsırk baǵdarlamasynyń juldyzyna aınalary sózsiz. Mundaı ekzotıkalyq janýarlar Astanalyq tsırk manejine sırek shyǵady.