Astana tsırki arystannyń tálimgerge shabýyl jasaǵany týraly aqparatty joqqa shyǵardy
ASTANA. QazAqparat - Elordalyq tsırk manejde arystannyń tálimgerge shabýyl jasaǵany týraly aqparatty joqqa shyǵardy, dep habarlady «QazAqparat» HAA tilshisi.
«WhatsApp» messendjerinde tsırk qyzmetkerine arystan shabýyldaǵan vıdeo taralýda. Onyń astynda «Bul Astanada bolǵan», «Búgin Astanada» degen jazbalar bar.
«Bul bizdiń tsırk, bizdiń zal, bizdiń manej emes. Bizde ondaı oqıǵa bolǵan joq. Bizde qazir baǵdarlamada jolbarystar ǵana bar, arystan joq. Jeksenbi qoıylymǵa kórermen kóp jınaldy, bizde bári jaqsy», - dedi gastroldik bólimniń bastyǵy Shahrızat Ibadıldına.
Sondaı-aq, tsırkte ondaı qyzmetkerdiń joq ekenin atap ótti.
QazAqparat tilshisi anyqtaǵandaı, bul birneshe jyl burynǵy vıdeo. Oqıǵa 2010 jylǵy qazanda Ýkraınanyń Lvov qalasynda oryn alǵan.
Eske salsaq, budan buryn QazAqparat áleýmettik jelide jalǵan aqparat taratqandarǵa QR Qylmystyq kodeksinde bas bostandyǵynan aıyratyn jaza qarastyrylǵanyn habarlaǵan bolatyn.
