«Astana» chempıondyqqa talasty jalǵastyratyn boldy

Búgin fýtboldan premer-lıga komandalary arasyndaǵy el birinshiliginiń 25-týrynda «Astana» «Jetisýdan» basym túsip, chempıondyqqa talasty jalǵastyratyn boldy, dep habarlaıdy Kazinform.

Elordalyq klýb búgingi kezdesýde jeńiske jetýge bar kúshin salatyny anyq edi. Óıtkeni, upaı joǵaltqan jaǵdaıda shymkenttik klýb bir týr buryn chempıondyq ataqqa qol jetkizetin.

Alǵashqy mınýttan shabýylǵa den qoıǵan astanalyq komanda sapynan Tımýr Dosmaǵambetov 30-mınýtta esep ashqan edi.

Al 50-mınýtta «Jetisý» sapynan Anes Rýjevıch tarazy basyn teńestirip ketti.

Budan keıin elordalyq klýb qaıtadan qarsylastar qaqpasy mańynda jıi boı kórsetti. Oıynnyń 96-mınýtynda Abat Aıymbetov soqqan gol «Astanaǵa» jeńis alyp keldi.

Osylaısha elordalyq komanda qarsylasynan 2:1 esebimen basym túsip, chempıondyqqa talasty jalǵastyratyn boldy.

Bıylǵy bas júlde taǵdyry 22 qazanda «Ordabasy» men «Shahter» kezdesýinde sheshiledi. Bul oıynda shymkenttik klýb kem degende teń tússe, bir týr buryn chempıon atanady.

Bul kúni «Oqjetpes» pen «Aqtóbe», «Qaısar» men «Atyraý» jasyl alańǵa shyǵady.

Sondaı-aq, búgin «Maqtaral» «Qyzyljardan» 2:1, «Qaırat» «Aqsýdan» 4:1 esebimen basym tússe, «Tobyl» men «Kaspıı» 1:1 esebine qanaǵat bildirdi.