Astana chempıondaryn qarsy aldy
ASTANA. 10 shilde. QazAqparat - Búgin, 10 shilde kúni, tańerteń tranzıttik reıspen Venadan Azııa chempıonatynda bokstan tamasha jeńiske jetken ulttyq komanda oraldy, dep habarlaıdy elordanyń resmı saıty qalalyq týrızm, dene tárbıesi jáne sport basqarmasyna silteme jasap.
Eske salaıyq, qurlyqtaǵy birinshilikte bizdiń bylǵary qolǵap sheberlerimiz 7 altyn, 1 kúmis alyp, Qazaqstan boksy tarıhynda úlken jetistikke jetken bolatyn.
Chempıondardy qarsy alýǵa týǵan-týystarymen birge, jaqyndary men dostary keldi. Sondaı-aq, boksshylardy qarsy alýǵa qalanyń qoǵamdyq jurtshylyǵy,sport súıer qaýym jáne jýrnalıster de jınaldy. Olar túsken boıda quramanyń bas jattyqtyrýshysy Myrzaǵalı Aıtjanovty quttyqtady.
«Bizdiń jigitter chempıonatqa jaqsy daıyndyqpen bardy. Ázirliktiń sapaly júrgenin nátıje kórsetip otyr. - dedi Myrzaǵalı Qulanuly. - Jalpy alǵanda, bizdiń basty jarysymyz áli alda. Álem chempıonatyna endi jaqsylap daıyndalýymyz kerek. Іri qurlyqtyq birinshilikke quramnyń aldyńǵy qatarly sportshylaryn jiberip, álem chempıonaty aldynda qaýqarymyzdy baıqap alǵymyz keldi. Qatyspaǵan birneshe sportshylarymyzdy aıtpaǵanda, biz Iordanııada quramanyń eń myqty boksshylaryn shyǵardyq. Bizdiń jigitter túgelge derlik salmaq sanaty boıynsha chempıon atandy. Olardyń qarsylastary da osal emes edi. Máselen, Mereı Aqshalov Mońǵolııanyń Olımpıada júldegerin tize búktirdi. Negizgi qarsylastar Úndistan men Ózbekstan komandasynan boldy».
Bokstan qurama kapıtany Danııar Eleýsinov Azııa chempıonatynda altyn aldy. Ári onyń qanjyǵasyna qurlyq birinshiliginiń úzdik boksshysy degen ataq ta bar.
«Nátıjelerge óte rızamyn. Úzdik boksshy atanǵanym eki ese qýanysh syılady. Barlyq kúsh-jigerimdi, tehnıkamdy salyp, qarsylastan basym túsýge tyrystym. Eń myqty qarsylas ekinshi jekpe-jektegi Azııa chempıonatynynń buǵan deıingi chempıony boldy. Alda álem chempıonatyna daıyndyq tur. Biraq, biz úshin osynyń barlyǵy da daıyndyq bolyp sanalady», - dedi ol.
Qazaqstandyq komandanyń qorjynyna alǵashqy altyndy jeńil salmaqta Temirtas Júsipov saldy. Bul iri halyqaralyq jarystardaǵy onyń tyrnaqaldy jeńisi edi. Sondyqtan, osy jeńistiń orny aıyryqsha kórinedi.
«Men rıngke alǵash bolyp shyqtym. Ne nárseni tyńnan bastaý ońaı emes qoı. Qobaljyǵanym da ras - deıdi Temirtas, - Sátin salǵanda jeńiske jetip, eń bastysy, jattyqtyrýshymnyń senimin aqtadym. Shynymdy aıtsam, Azııa chempıonatynda osyndaı bıik shyńǵa shyǵamyn dep oılaǵan joqpyn. Sezimimdi sózben aıtyp jetkize alar emespin».
