«Astana» biz kútpegen taktıka qoldandy — «Qaırat» bapkeri

ALMATY. KAZINFORM — «Qaırat» klýbynyń bas bapkeri Rafael Ýrazbahtın Qazaqstan Premer-lıgasynyń sońǵy týrynda «Astanaǵa» qarsy ótken match jaıly pikir bildirdi. 

— Chempıon bolǵanymyzǵa óte qýanyshtymyz. Barlyq jankúıerdi osy jeńispen quttyqtaımyn. Bul biz úshin tarıhı kún — «Qaırat» alǵash ret qatarynan eki ret chempıon atandy. Biz osy jetistikke maqsatty túrde umtyldyq. Oıynshylarǵa úlken alǵys aıtamyn — bul olardyń eńbeginiń jemisi. Qajyrly eńbek óz nátıjesin beredi. Biz óte qýanyshtymyz, — dedi ol.

Bapker almatylyq komandanyń oıynshysy Ofrı Aradty birinshi taımda almastyrýdyń sebebin túsindirdi.

— Ol sál qobaljyǵandaı kórindi, keı sátterde jyldamdyq jetispedi. Sondyqtan jyldamyraq oıynshyny shyǵarýdy jón kórdik. Múmkin bir nárse mazalaǵan shyǵar, ázirge sóılesken joqpyn. Bir nárseni ózgertý kerek boldy, — dedi ol.

Bapker úzilis kezinde komandasyna qandaı nusqaýlyq bergenin de atap ótti.

— Úzilis kezinde oıynshylarmen qatal sóılestim. Birinshi taımdaǵy oıynymyz unamady. Qaqpaǵa soqqy az, al qarsylas qaýipti sátterdi kóbirek jasady. Qarsylasty da moıyndaý kerek. Olar bizge oıyn tizginin berip, kútpegen taktıka qoldandy. Biz, kerisinshe, olar dopqa kóbirek ıelik etedi dep oılaǵanbyz. Biraq olar bizdi óz alańdaryna tartyp aldy. Sol qarymta shabýyldardyń biri arqyly gol soqty. Úziliste oıynshylarǵa: «Bulaı bolmaıdy. Jankúıerlerdiń aldynda bulaı oınaýǵa haqymyz joq. Búkil stadıon bizdi qoldaýǵa keldi, biz jeńilmeýimiz kerek» dep aıttyq, — dedi Rafael Ýrazbahtın.

Eske salaıyq, «Qaırat» ekinshi jyl qatarynan Qazaqstan chempıony boldy.