Astana bıýdjetine kólik salyǵynan 10 mlrd teńgeden asa qarjy tústi
ASTANA. KAZINFORM — Astana qalasynyń bıýdjetine jyl basynan beri jeke tulǵalardyń kólik quraldaryna salynatyn salyq boıynsha 10 mlrd teńgeden astam qarjy tústi. Bul týraly Memlekettik kirister departamenti málim etti, dep habarlaıdy elorda ákimdiginiń resmı saıty.
Vedomstvo málimetinshe, búgingi tańda kólik salyǵy boıynsha bereshek kólemi 7 mlrd teńgeni qurap otyr.
Departament ókilderi Qazaqstan Respýblıkasynyń zańnamasyna sáıkes, salyqty ýaqytyly tólemegen jaǵdaıda árbir keshiktirilgen kún úshin ósimpul esepteletinin eske salady. Budan bólek, bereshegi bar azamattarǵa qatysty májbúrlep óndirip alý sharalary qoldanylady. Atap aıtqanda, boryshkerlerge habarlama joldanyp, salyq buıryǵy shyǵarylady, sondaı-aq materıaldar jeke sot oryndaýshylaryna beriledi.
1 aılyq eseptik kórsetkishten asatyn bereshek mindetti túrde májbúrli túrde óndirip alýǵa jatady. Al salyq buıryǵyn oryndaý merzimi 30 jumys kúnin quraıdy.
Qala turǵyndary ózderiniń bereshegin birneshe yńǵaıly tsıfrlyq servıster arqyly teksere alady:
• MKK resmı saıty — kgd.gov.kz;
• eGov.kz portaly;
• eSalyq Azamat mobıldi qosymshasy.
Sonymen qatar, elden shyǵýǵa ýaqytsha shekteýlerdiń bar-joǵyn aisoip.adilet.gov.kz saıtynan bilýge bolady.
Astana qalasy MKD azamattardy salyqtyq mindettemelerin ýaqytyly oryndaýǵa shaqyrady. Bul qosymsha shyǵyndardyń aldyn alyp, qarjylyq júktemeni azaıtýǵa múmkindik beredi.
Tolyǵyraq aqparat — 1414/3 nómirine nemese @astana_mkd_dgd_astana Instagram paraqshasy boıynsha ala alasyz.
Osyǵan deıin Astanada jańa tartymdy oryndar qaı tustarda ashylatynyn jazdyq.
