Astana bıýdjetine túsetin salyq kólemi artyp keledi
ASTANA. QazAqparat - Elorda bıýdjetine túsetin salyq kólemi artyp keledi. Bul týraly búgin Astana qalalyq strategııalyq jáne bıýdjettik josparlaý basqarmasynyń basshysy Rasýl Orazǵulov aıtty, dep habarlaıdy QazAqparat.
«Qala damýynyń ekonomıkalyq kórsetkishteri dınamıkasyn eskerer bolsaq, aǵymdaǵy jyldyń qańtar-shildesinde Astana bıýdjetine túsken kiris kólemi 136,2 mlrd teńgeni qurap otyr. 2017 jyldyń sáıkes kezeńimen salystyrǵanda ósim 2,4 paıyzdy quraıdy. Onyń ishinde salyq túsimderi 126 mlrd teńgeni qurap, 3,6 paıyz ósim kórsetti», - dedi ol elorda ákimdiginde ótken qoǵamdyq tyńdaý barysynda.
Onyń aıtýynsha, osyǵan baılanysty qalanyń jalpy kirisiniń jyldyq boljamyn 6 mlrd 10 mln 479 teńgege ulǵaıtý usynylady. Atalǵan somanyń 3 mlrd teńgesin salyq túsimderi, 1,4 mlrd teńgesi salyqtyq emes túsimder jáne 1,6 mlrd teńgesin negizgi kapıtaldy satýdan túsken túsimder quraıdy.
«Osylaısha, Astana qalasynyń naqtylanǵan bıýdjetiniń jalpy kólemi engiziletin ózgertýlerdi esepke alǵanda 433 mlrd teńge 246 mln teńgeni qurap, jyl basynda bekitilgen bıýdjet 13 paıyzǵa nemese 52 mlrd 11 mln teńgege artady», - dedi ol.
