Astana bıýdjeti 1,48 trln teńgege deıin artady
ASTANA. KAZINFORM - Astananyń 2026 jylǵa naqtylanǵan jergilikti bıýdjetiniń jalpy shyǵystary 1 trln 483 mlrd teńgeni quraıdy. Bul týraly qalalyq Ekonomıka jáne bıýdjettik josparlaý basqarmasynyń basshysy Aıjan Túgelbaeva máslıhattyń kezekten tys sessııasynda málim etti.
Onyń aıtýynsha, bıýdjetti naqtylaý qalanyń óz tabysynyń ósýine baılanysty bolyp otyr. Jalpy kiris jospary 111,4 mlrd teńgege deıin ósken, onyń ishinde 86,4 mlrd teńge qosymsha salyq túsimderi esebinen qamtamasyz etiletin bolady.
– Astana qarqyndy túrde damyp keledi. Ekonomıkalyq ósiminiń ortasha qarqyny 10% deńgeıinde. Halyq sany orta eseppen 7,5%-ǵa ósip otyr. Qurylys jumystarynyń qarqyny 8,2%-ǵa, kólik jáne logıstıka salasyndaǵy belsendilik 30%-ǵa artty. Saýda kólemi 3%-ǵa ósti, - dedi mekeme basshysy.
Onyń aıtýynsha, jyl basynan beri sýbsıdııalanatyn qoǵamdyq kólik baǵyttarynyń sany 110-ǵa deıin artqan, al jolaýshylar aǵyny 12%-ǵa ósken. Jol ınfraqurylymy boıynsha 30 shaqyrym jol jóndelip, taǵy 7,6 shaqyrym jol salynyp jatyr.
Jylý energetıkasy jáne kommýnaldyq sharýashylyq salasynda qýattylyqty arttyrýǵa baǵyttalǵan jobalar júzege asyrylyp jatyr. Olar jylý energııasyn óndirý qýatyn saǵatyna 1000 gıgakalorııaǵa, al elektr energııasyn 423 megavolt-amperge deıin ulǵaıtýǵa múmkindik beredi.
– Qala kórkin jaqsartýǵa qosymsha 18,3 mlrd teńge bólinedi. Bul qarjy aýlalardy jóndeýge, kógaldandyrýǵa, sanıtarlyq tazalyqqa jáne LRT stantsııalary men shetki aýdandardy abattandyrýǵa jumsalady, - dedi ol.
Aıjan Túgelbaeva atap ótkendeı, qosymsha shyǵystar qalanyń jedel qajettilikterin, strategııalyq damý mindetterin, Memleket basshysy men Úkimettiń tapsyrmalaryn, sondaı-aq máslıhat depýtattary men qoǵamdyq keńes músheleriniń usynystaryn eskere otyryp jasalǵan.
Aıta keteıik, Astanada 15 mlrd teńgege jýyq bıýdjet qarjysy ıgerilmegen.
