«Astana-Býrabaı» tasjoly boıynda servıstik qyzmet pavılondary ornatylýda
KÓKShETAÝ. QazAqparat - Aqmola oblysynyń ákimi Málik Myrzalın halyqaralyq standarttarǵa saı salynǵan jol boıyndaǵy qyzmet kórsetý nysanynyń ashylýyna qatysty, dep habarlaıdy QazAqparat tilshisi ákimdiktiń baspasóz qyzmetine silteme jasap.
Atalmysh jumystary óńirdegi joldarda modýldi pavılondar ornatý týraly ótken jyly Aqmola oblysy ákimdigi men «QazAvtoJol» UK» AQ-nyń arasynda jasalǵan kelisim sheńberinde júzege asyrylyp otyr.
«Astana-Býrabaı» tasjolynyń boıynda jolaýshylar úshin yńǵaıly «KazWay» modýldi tıpti servıstik qyzmet kórsetetin alǵashqy pavılon ornatyldy.
Aýmaǵy 43 sharshy metr nysan úsh qabatty tereze, sýyq ótkizbeıtin jáne órtke tózimdi qabyrǵa materıalynan jasalǵan.
Qys maýsymynda ınfraqyzyl jylytqyshtarmen jylytylady. Blok-modýl elimizdegi kásiporyndarda shyǵarylǵan. Aldaǵy ýaqytta osyndaı modýldi pavılondarmen ana men bala bólmesin jabdyqtaý josparda bar.
Merdiger kompanııanyń ókili Almaz Qanattyń Aqmola oblysy ákimi Málik Myrzalınge bergen málimeti boıynsha nysanda jolaýshylar úshin barlyq jaǵdaı jasalǵan. Symsyz ınternet, beınebaqylaý kamerasy, shaǵyn kofehana, erler men áıelder jáne múgedekterge arnalǵan dárethana qarastyrylǵan.
«Sanıtarlyq júıesinde biz ushaqtar men poıyzdarda qoldanylatyn vakýmdy tehnologııany qoldanyp otyrmyz. Bul sý únemdeýge múmkindik beredi», - dep atap ótti kompanııa dırektory.
Búgingi tańda eshqandaı talaptarǵa saı kelmeıtin beton jáne kirpishten jasalǵan eski dárethanalardy súrý jumystary júrgizilýde. «QazAvtoJol» UQ» AQ ókili Erlan Rysbekovtyń aıtýynsha: «Bul Aqmola oblysynda jol boıyndaǵy qyzmet kórsetý ınfraqurylymyn jańartý boıynsha qolǵa alynǵan jumystardyń basy ǵana».
Maýsymnyń 15 deıin osyndaı 6 pavılon ornatý josparlanyp otyr. Onyń tórteýi «Astana-Býrabaı» tas jolynyń boıynda, taǵy ekeýi Býrabaı kýrortynda ornatylady.
