Astana – Býrabaı baǵytynda taǵy bir qosymsha elektr poıyzy qatynaıtyn boldy

ASTANA. KAZINFORM — Týrıster arasynda tanymal baǵyttardyń kólik qoljetimdiligin arttyrý jáne jolaýshylarǵa jaıly jaǵdaı jasaý maqsatynda «Jolaýshylar tasymaly» AQ «Astana-1 – Býrabaı kýrorty» baǵytynda №6811/6812 qosymsha qala mańy elektr poıyzyn jolǵa shyǵardy. Bul týraly «Jolaýshylar tasymaly» AQ baspasóz qyzmeti málim etti.

Elektr poıyzy ár sársenbide qatynaıdy.

Astanadan saǵat 11:00-de shyǵyp, 13:35-te Býrabaı stantsııasyna jetedi. Keri baǵytta poıyz 14:15-te jolǵa shyǵyp, 17:00-de Astanaǵa oralady.

— Poıyz quramynda 4 vagon bar. Jolaýshylar úshin 1, 2 jáne 3-synyptaǵy qyzmet kórsetý túrleri qoljetimdi. Vagondar kondıtsıonerlermen, aýa tazartý júıesimen, bıoájethanalarmen, múmkindigi shekteýli jolaýshylarǵa arnalǵan arnaıy oryndarmen, yńǵaıly oryndyqtarmen, velosıped qoıatyn oryndarmen jáne Vputi.kz medıaportalyna qoljetimdi tegin Wi-Fi jelisimen jabdyqtalǵan, — delingen habarlamada.

Qala mańy baǵytyndaǵy jolaýshylar poıyzyna bıletterdi jóneltýge 10 kún qalǵanda satyp alýǵa bolady. 

Eske salsaq, osyǵan deıin Býrabaı baǵytynda «Burabay Express» jańa elektrpoıyzy iske qosylǵan bolatyn. №888/887 «Burabay Express» Comfort+ jańa býyn elektrpoıyzy mobıldi qurylǵylardy zarıadtaýǵa arnalǵan USB qosqyshymen jabdyqtalǵan.