Astana-Býrabaı aqyly jolymen júrgen reseılik kólikterdiń sany kúrt artty
«2015 jylmen salystyrǵanda 2016 jyly RF-dan keletin kólik quraldarynyń aǵyny artyp otyr. Máselen, ótken jylda atalǵan aqyly jolmen reseılikter mingen 35 myń kólik júrip ótse, al bıyldyń tek jarty jylynda Astana- Şýche aralyǵyndaǵy jolmen júrgen 52 myńnan astam kólik tirkeldi», - deıdi kompanııa ókilderi.
Atap aıtqanda, jalpy Astana-Şýche avtojolynda 2016 jyldyń 1 jartysynda 533 mln teńgeden astam qarajat jınalyndy. Ótken jyldyń sáıkes merzimine qaraǵanda, jınalǵan qarajat 3% artty.
«Tólem júıesi árdaıym jańartylady jáne jyldan jylǵa ótkizý qabiletin arttyrady. Osyǵan sáıkes, 2016 jyldyń birinshi jartysynda júıede 1 mln 200 myńǵa jýyq avtokólik tirkelgen. Ótken jyldyń sáıkes kezeńimen salystyrǵanda, avtokólik aǵynynyń qarqyndylyǵy 2,8% ósti. Demalys kúnderi Astana-Şýche aqyly jolynda avtokólik aǵymy kire beriste 12 500 birlikke teń, al jumys kúnderi osy kórsetkish kúnine 5 500-ge jýyq avtokólikke quraıdy», - delingen «QazAvtoJol» málimetinde.
Qazaqstan Respýblıkasy kólik júıesiniń ınfraqurylymyn damytýdyń jáne yqpaldastyrýdyń 2020 jylǵa deıingi memlekettik baǵdarlamasyna jáne «QazAvtoJol» UQ» AQ 2013 - 2022 jyldarǵa arnalǵan damý strategııasyna sáıkes, uzyndyǵy 6 982 shaqyrymǵa jýyq avtojol ýchaskelerinde aqyly tólem júıesiniń eńgizilýi josparlanǵan. Osy rette Batys Eýropa - Batys Qytaı dálizi, Astana - Atbasar, Almaty - Qapshaǵaı, Pavlodar - RF shekarasy (Omby) jáne basqa joldar qamtylyp otyr.
Aıta keteıik, Eýropa qaıta qurý jáne damý banki Qazaqstan Respýblıkasynyń avtojoldarynda aqyly júıeni engizýdi qarjylandyrmaq.
Búgingi tańda qaryzdy paıdalanýǵa berý sharttary jáne josparlaý máseleleri zerdelenýde. Aqyly júıeni engizý memleketimizdiń negizgi halyqaralyq dálizderinde, onyń ishinde «Nurly jol» memlekettik baǵdarlamasy aıasynda salynatyn ýchaskelerde engizý josparlanǵan.
