Astana, Bishkek, Tashkent sý-energetıkalyq balans boıynsha kelisimge keldi
ASTANA. KAZINFORM – Sholpan-Ata qalasynda Qazaqstan, Qyrǵyzstan jáne Ózbekstannyń energetıka jáne sý sharýashylyǵy vedomstvolarynyń úshjaqty kezdesýi ótti. Basqosý nátıjesinde óńirdiń sý-energetıkalyq teńgerimin retteıtin birqatar hattamaǵa qol qoıyldy.
Qazaqstan delegatsııasyn Energetıka mınıstri Erlan Aqkenjenov bastap bardy.
Negizgi qujatta Toqtaǵul sý qoımasynan sý jiberýdi qamtamasyz etý boıynsha taraptardyń mindettemeleri naqty kórsetildi. Kelisimge sáıkes, Qazaqstan men Ózbekstan Qyrǵyzstanǵa elektr energııasyn jetkizedi. Sonymen qatar, Reseı Federatsııasynan Qyrǵyzstanǵa elektr energııasyn Qazaqstannyń energetıkalyq júıeleri arqyly tranzıtteý sharttary da kelisildi. Atalǵan sharalar sý qoımasyndaǵy sý deńgeıin qajetti mólsherde ustap turýǵa jáne aldaǵy vegetatsııalyq kezeńde elimizdiń ońtústik óńirlerin sýarmaly sýmen qamtamasyz etýge septigin tıgizedi.
Sapar aıasynda ekijaqty kelissózder de júrgizildi. Ózbekstan tarapy 2026 jyldyń naýryz-jeltoqsan aılary aralyǵynda Qazaqstanǵa shamamen 900 mln kVt-saǵ. kóleminde elektr energııasyn jetkizý jónindegi hattamaǵa qol qoıyldy. Bul kelisim elimizdiń ońtústik aımaǵynda josparlanǵan elektr stantsııalaryn jóndeý jumystary kezinde týyndaýy múmkin energııa tapshylyǵyn boldyrmaýǵa baǵyttalǵan.
Energetıka mınıstri Erlan Aqkenjenovtiń aıtýynsha, sý-energetıka salasynda árbir qadam dáldik pen kelisilgen kestege saı júrgizilýi tıis.
– Qol qoıylǵan hattamalar – kórsetkishteri, merzimi men baǵalary kórsetilgen naqty jumys qujaty. Biz jetkizýdiń tehnıkalyq sharttaryn naqtylap, ózekti máselelerdi sheshtik. Qazaqstan óz mindettemelerin tolyq oryndaıdy jáne seriktester tarapynan da osyndaı ustanymdy kútedi. Bul óńirdiń energetıkalyq jáne sý qaýipsizdigin qamtamasyz etýdiń mańyzdy tetigi, - dedi ol.
Jasalǵan kelisimder aldaǵy kúzgi-qysqy kezeńdegi táýekelderdi azaıtýǵa múmkindik beredi. Sondaı-aq kelesi vegetatsııalyq maýsymǵa boljamdy sý qoryn jınaýǵa qolaıly jaǵdaı jasaıdy. Bul – elimizdiń ońtústik óńirlerindegi agrarlyq sektor úshin mańyzdy faktor.