Astana boıynsha ishki memlekettik aýdıt departamentiniń basshysy aýysty

ASTANA. KAZINFORM — Murat Orazbaı Astana qalasy boıynsha ishki memlekettik aýdıt departamentin basqarady, dep habarlaıdy Іshki memlekettik aýdıt komıtetiniń baspasóz qyzmeti.

— Qazaqstan Respýblıkasy Qarjy mınıstrliginiń Apparaty basshysynyń buıryǵymen Murat Asqaruly Orazbaı Qazaqstan Respýblıkasy Qarjy mınıstrliginiń Іshki memlekettik aýdıt komıtetiniń Astana qalasy boıynsha ishki memlekettik aýdıt departamentiniń basshysy bolyp taǵaıyndaldy, — delingen habarlamada.

Murat Orazbaı — memlekettik aýdıtor, Prezıdenttik jastar kadrlyq rezerviniń múshesi. Eńbek jolyn jetekshi maman qyzmetinen bastap, memlekettik aýdıt júıesinde jáne ortalyq memlekettik organdarda mol tájirıbe jınaqtady. Ár jyldary Qazaqstan Respýblıkasy Ulttyq ekonomıka mınıstrliginde, Premer-Mınıstrdiń Keńsesinde jáne Qazaqstan Respýblıkasy Prezıdenti Ákimshiliginde túrli basshylyq jáne sarapshylyq laýazymdardy atqardy. Jańa taǵaıyndaýǵa deıin Qarjy mınıstrliginiń Іshki memlekettik aýdıt komıteti tóraǵasynyń orynbasary qyzmetin atqardy.

Jańa basshyny ujymǵa Ernar Bóribaıuly Erjanov tanystyryp, departament qyzmetiniń negizgi basymdyqtaryn atap ótti jáne qoıylǵan mindetterdiń sátti oryndalýyna izgi tilekterin bildirdi.

Osydan buryn Marat Áshim Prezıdenttiń keńesshisi bolyp taǵaıyndalǵanyn habarlaǵanbyz.