Astana boranynyń saldary: Er adam jansaqtaý bóliminde jatyr
ASTANA. QazAqparat - Astanada soqqan keshegi boran saldarynan qalanyń eki turǵyny zardap shekti. Onyń biriniń jaǵdaıy óte aýyr, qazir ol jansaqtaý bóliminde jatyr. Bul týraly Astana qalalyq densaýlyq saqtaý basqarmasynyń basshysy Kamaljan Nadyrov aıtty, dep habarlaıdy QazAqparat.
«Jabyq bas súıek-mı jaraqatymen 1966 jyly dúnıege kelgen naýqas aýrýhanaǵa jetkizildi. Oǵan ota jasaldy. Jedel járdemdi «Jasyl oram» turǵyn úı kesheni aýmaǵynan ótip bara jatqan adam shaqyrǵan. Naýqas es-tússiz jatyr. Sondyqtan qazirgi ýaqytta onyń jaraqatty qalaı alǵanyn bilý múmkin emes», - dedi basqarma basshysy.
Onyń aıtýyna qaraǵanda, ekinshi patsıenttiń basyna ǵımarattyń syrtqy qaptamasy qulap ketken. Jalpy ótken táýlikte elordanyń barlyq medıtsınalyq uıymdary tótenshe jaǵdaı rejiminde jumys istedi. Dárigerlerdiń kómegine boran saldarynan túrli jaraqat alǵan 39 adam júgindi.
Al jergilikti polıtsııanyń málimetinshe, 102 nómirine 2,3 myń qońyraý túsken.
«Onyń 172-si jol-kólik erejesin buzýǵa, 175-i jol oqıǵasyna baılanysty boldy. Sondaı-aq 82 adam kólik quraldarynyń jáne basqa da múlikteriniń búlingendigine shaǵymdandy. Polıtsııa qyzmetkerleri qar qursaýynan shamamen 70 kólikti shyǵaryp, 17 adamdy qaýipsiz jerge shyǵardy»,- dedi Astana qalalyq jergilikti polıtsııa qyzmeti bastyǵynyń orynbasary Asqar Amrın.
