«Astana» bıyl «Atyraýmen» ekinshi márte teń oınady

ASTANA. QazAqparat - Búgin fýtboldan premer-lıga komandalary arasyndaǵy el birinshiliginiń 16-týrynda «Astana» men «Atyraý» teń tústi, dep habarlaıdy QazAqparat tilshisi.

Elordalyq klýb keıingi oıyndarda upaı joǵaltyp keledi. Sońǵy bes kezdesýde eki márte teń tústi. Osynyń saldarynan qarsylastarynan uzap ketýge múmkindik bolmaı otyr.

Elordalyq klýb óz alańynda «Atyraýmen» 0:0 esebimen teń nátıjege qanaǵat bildirdi.

Aıta ketsek, alǵashqy aınalymda da komandalar dál osyndaı esepke qanaǵat bildirgen edi.

Al júldeli oryndardyń birinen úmitker sanalyp júrgen «Aqtóbe» óz alańynda Qyzylordanyń «Qaısaryn» 1:0 esebimen súrindirdi.

Dál qazir «Ordabasy» (Shymkent) men «Qyzyljar» (Petropavl) oınap jatyr. Birinshi kezeńnen keıin petropavldyq klýb qarsylasynan 1:0 esebimen basym túsýde.

Al 23 shildede 18:00-de «Shahter» (Qaraǵandy) men «Kaspıı» (Aqtaý), 19:00-de «Qaırat» (Almaty) pen «Maqtaral» (Túrkistan) oınaıdy.

Bul týrdy 21:00-de «Tobyl» (Qostanaı) men «Oqjetpes» (Kókshetaý) komandalary túıindeıdi.

Eske salsaq, budan buryn «Jetisý» men «Aqsý» teń tústi.