Astana bıligi nóserden keıingi jaǵdaıǵa baılanysty halyqtan keshirim surady
ASTANA. QazAqparat - «Astana kóshelerin sý alyp ketý jaǵdaılaryna jol berilgeni úshin halyqtan keshirim suraımyz». OKQ-da ótken baspasóz máslıhatynda Astana qalasy ákiminiń orynbasary Qosman Aıtmuhambetov osylaı dedi.
«Qazgıdromet» RMK málimetine sáıkes, 20 tamyz ben 21 tamyz aralyǵynda Astananyń oń jaǵalaýynda 36 mıllımetr, al sol jaǵalaýynda 45 mılımetrlik jaýyn-shashyn jaýǵan. Bul aılyq normadan 40 paıyzǵa artyq. Onyń ústine nóserli káriz júıesi úzdiksiz jumys atqaryp, bir táýlik ishinde bir mıllıon kýb (nemese saǵatyna 45 myń kýb) sý qabyldandy. Qalanyń negizgi magıstraldy kóshelerinde sý basý jaǵdaıy tirkelgen joq. Aıta keterligi, 20 tamyz kúni saǵat tańerteńgi 8-den bastap, sondaı-aq 21 tamyzda saǵat tańǵy 5-ten bastap tolassyz jaǵan jaýyn toqtamady. 20 tamyzda jaýyn tek keshki 18:00-de ǵana saıabyrlady», - deıdi ol.
Qosman Aıtmuhambetovtiń aıtýynsha, osynyń saldarynan jaýynnyń sýyn qabyldaýshy tehnıkalar úlgermeı, Nájimedenov, Táýelsizdik, Momyshuly kóshelerin sý alyp ketken. Tek tańǵy beske jýyq atalmysh kóshelerden sýdy soryp, tazartý múmkin bolǵan.
«Mamandandyrylǵan kásiporyndar men kommýnaldyq kásiporyndar osy ýaqyt aralyǵynda táýlik boıy damylsyz jumys istedi. OKQ alańyn paıdalanyp, qala halqyna alǵys aıta otyryp, keshirim suraǵymyz keledi. Sý alyp ketý jaǵdaılaryna jol berildi. Eki saǵattyń ishinde másele retke kelgenimen, báribir jaǵdaıdyń oryn alǵanyn jasyra almaımyz», - dedi Qosman Aıtmuhambetov.
