Astana bıligi aýyz sýdyń nege berilmeı otyrǵanyn túsindirdi

ASTANA. QazAqparat - Astana ákimdiginiń baspasóz qyzmeti qalanyń Kenesary kóshesindegi birneshe turǵyn úıdiń aýyz sýsyz qalýyna ne sebep bolǵanyn túsindirdi. Bul týraly qala ákiminiń baspasóz hatshysy Elvıra Júrgenbaeva óziniń Feısbýk paraqshasyna jazdy, dep habarlaıdy QazAqparat tilshisi.

«25 tamyz kúni saǵat 13:00-de Kenesary kóshesi 79/1 meken-jaıynda «Aqnazar» JShS kezekti qurylys jumystary kezinde D=800 MM iri magıstraldy sý qubyryna zaqym kelgen. Sonyń saldarynan qazirgi ýaqytta Kenesary kóshesindegi 79/1, 60, 60a, 79,74,75,75/1,80,82,84 turǵyn úıler men jeke sektor aýyz sýsyz qalyp otyr», - delingen habarlamada.

Dál qazir «Astana sý arnasy» Kenesary 79/1 meken-jaıy boıynsha ornalasqan magıstraldy sý qubyryndaǵy olqylyqtardy joıý ústinde.

«Keltirilgen shyǵyndy «Aqnazar» JShS óteıdi», - dep habarlaıdy qala ákiminiń baspasóz qyzmetinen.