«Astana Bike» maýsymy 25 sáýirde bastalady
ASTANA. QazAqparat - Bıylǵy maýsymda «Astana Bike» ne ózgeretini týraly Velocity.kz qoǵamdyq qorynyń jetekshisi Almagúl Qasymova aıtyp berdi, dep habarlaıdy Elorda Info tilshisi.
Bıyl Astanadaǵy velostansalar sany 180-ge, al velosıpedter 1280-ge deıin jetkiziledi.
«25 sáýir «Astana Bike» maýsymyn bastaý josparlanǵan. Bizdiń jumysymyz aýa raıyna baılanysty ekenin eskerý kerek. Eger kún jylynsa velosıpedterdi shyǵara alamyz. Oǵan deıin stansalardy jýyp, ornatyp jáne teksergen soń maýsymdy bastaımyz», - dedi Almagúl Qasymova.
Onyń aıtýynsha, bıyl velosıpedti jalǵa alý baǵasy ózgerissiz qalady. Abonement burynǵysha 10 000 teńge, jańa paıdalanýshy úshin kartochka depozıti 1000 teńge, al shottaǵy eń tómengi balans 500 teńge bolýy kerek. ıAǵnı, jańa abonementti rásimdeý 11 500 teńgeni quraıdy. Paıdalanýshy kartany joǵaltqan jaǵdaıda maýsymdyq aktıvatsııa úshin 10 000 teńge tóleýi tıis. Sondaı-aq ýaqytsha jalǵa berý tarıfi de ózgerissiz qalady: jarty saǵaty - tegin, bir saǵaty - 100 teńge, al eki saǵaty - 250 teńge. Eskeretini, bul júıe qysqa ýaqytqa arnalǵan sapar úshin arnalǵan, sebebi, stansalardyń qashyqtyǵy 500 metrden aspaıdy.
16 sáýirden bastap «Keruen City» oıyn-saýyq ortalyǵynda satý bólimi jumysyn bastady.
Paıdalanýshylar kartaǵa aktıvatsııa jasap, balansyn tolyqtyra alady. Ekinshi satý bólimi taıaýda «7 Kontınent» bıznes-ortalyǵynda ashylady.
«EKSPO» sheńberinde qosymsha 30 stansa ornatý josparlanǵan bolatyn. Onyń 15-i kórme aýdanyna ornatyldy, al qalǵan 15-in bıyl halyq tyǵyz ornalasqan aýdanǵa ornatamyz. Mysaly, turǵyn úıleri kóp «Jaǵalaý» aýdany men Uly dala kóshesindegi jańa úılerdiń mańaıyna», - dedi ol.
Onyń aıtýynsha, paıdalanýshylar velostansa ornatylsa dep jıi ótinish bildiredi jáne eń tanymal stansalardy anyqtaý úshin júıede monıtorıng júrgiziledi.
«Ondaı stansalardy biz múmkindiginshe keńeıtýge tyrysamyz. Sondaı-aq belsendiligi az stansalardy azaıtyp, júktemesi kópterin keńeıtemiz», - dep túsindirdi Qasymova.
