Astana: Bezendirý boıynsha Naýryz meıramy Jańa jyldan kemshin qalyp otyrǵan joq
ASTANA. QazAqparat - Elordada Naýryzǵa arnalǵan quttyqtaý mátinderinde kemshilikterdiń ketpeýi qadaǵalanyp otyr.
Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda Astana qalasy Іshki saıasat basqarmasynyń basshysy Bolat Tilepov málim etti.
«Jalpy, Naýryz qarsańynda qaladaǵy bezendirý men daıyndyq máselesi kópshilikti jıi tolǵandyrady. Óıtkeni, turǵyndar ulttyq meıramǵa daıyndyqty Jańa jylmen salystyryp jatady. Bezendirý jumystary Jańa jylda jáne Naýryzda bir aı buryn júrgiziledi. Árıne, bul jerde ulttyq merekege daıyndyq kózge kórinbeıdi degen naz bar. Jańa jyl kezinde kózge kórinetin shyrshalar qurylǵannan keıin erekshelenip ketedi. Atap aıtqanda, jalpy bezendirý jumystary boıynsha Naýryz meıramy Jańa jyldan kemshin qalyp otyrǵan joq»,-dedi B. Tilepov.
Onyń sózine qaraǵanda, qaladaǵy quttyqtaý mátinderin kóbine jekemenshik uıymdar, memlekettik organdar ózderiniń kúshimen jasaıdy. «Keıbir jerlerde mátinderde kemshilikter men qatelikter bolyp jatady. Biz ony udaıy baqylap otyramyz. Árıne, aýqymdy jumys bolǵannan keıin biren-saran kemshilikter bar shyǵar, biraq ol júıeli túrde bolyp jatyr dep aıtýǵa bolmaıdy»,-dedi basqarma basshysy.
